Back to Top
Vigilante banner image

Lo baha salarionan mas haltu ku 295 mil i 227 mil florin den 3 parti


November 29, 2022 • 3 minüt pa lesa

Minister di Finansa Javier Silvania a splika di no a risibí tur dokumento pa por hasi un kalkulashon real pa loke ta trata e LNT.

WILLEMSTAD – Si un funshonario den tòp di sektor públiko òf semi públiko a akordá un salario mas altu ku loke e lei yamá Landsverordening normering topinkomens (LNT) ta stipulá komo máksimo promé ku e lei a drenta na vigor, anto e ora ei lo baha e salario bèk. Lo hasi esaki durante 2 aña, bahando e salario den tres parti te ora e yega e stándar di 295 mil florin máksimo pa entidatnan grandi i 227 mil pa empresanan chikí ku ta afiliá na gobièrnu. Asina artíkulo 23 dje ordenansa ta regla.

Gobièrnu a manda kontesta riba un serie di pregunta ku miembronan di Parlamento a hasi resientemente. Minister di Finansa Javier Silvania a splika di no a risibí tur dokumento pa por hasi un kalkulashon real pa loke ta trata e LNT. Di tur manera no a risibí e resúmen general di e struktura salarial dje direktornan. “Sinembargo komo ku e stándar lo ta 130% di e salario di Minister-Presidente, e kalkulashonnan no ta basá riba informashon korekto.” Gobièrnu no por kalkulá tampoko kiko e redukshon lo nifiká pa e forsa di kompra mirando e situashon di ekonomia, pasó no ta konosí kuantu funshonario tòp ta gana salario mas haltu ku e stándar, i ku lo mester entregá parti di nan salario.

Gobièrnu no por kontestá e pregunta ta kuantu persona ta kobra mas ku 20 mil florin pa luna antó, ni kiko lo ta e konsekuensia di e aprobasjon dje lei riba e presupuesto di e entidatnan gubernamental akí. Pero segun gobièrnu esaki lo ta disponibel di forma obligatorio despues ku e lei drenta na vigor. “E informashon tokante e kantidat di personanan ku ta kobra mas ku 20 mil florin pa luna, lo ta disponibel despues ku e proposishon di lei akí drenta na vigor. Pasó e ora ei lo tin un obligashon di publikashon vigente pa tur hende na entidatnan afiliá na gobièrnu ku ta gana riba e stándar. Ta generalmente konosí ku niun hende ke duna informashon tokante nan entrada. Ni durante e investigashonnan hasí akí, pasó e entidatnan interogá no a entregá e informashon. Pero por konkluí ku koutela sí ta kua ta e entidatnan gubernamental ku a alkansá òf surpasá e stándar, pa medio dje presentashonnan ku tabatin den Parlamento.” 

Mas aleu gobièrnu ta splika ku e maksimalisashon dje entradanan tòp lo no tin konsekuensia pa e personal dje entidatnan. “Na Hulanda ta trahando riba un proyekto di lei pa e stándar konta pa tur trahadó i no solamente e funshonarionan den tòp. Ta premirá ku riba término largu lo tin un kambio den e struktura salarial dje entidatnan, pasó e focus lo ta riba e stándar.”

Riba e pregunta kiko e NV di gobièrnu ta pensa tokante e suma 295 mil florin i si nan lo aseptá esaki, gobièrnu ta splika ku Minister Silvania a papia ku algun direktor i despues di e reunion, nan a entregá nan opinion tokante e proposishon di e Minister por eskrito na Konseho di Ministernan. “E direktornan ta di opinion ku mester mantené un otro suma pa kompensashon riba términa largu (penshun) i ku nan no ta di akuerdo tampoko ku e altura dje suma forfaitair.” Forfaitair ta un suma òf porsentahe predeterminá (via un kontrakt) ku mester paga den sierto situashon. Konseho di Ministernan di Reino a pone komo kondishon ku mester introdusí ku ‘lo kalkulá e suma forfaitair di 30 mil florin pa aña pa kompensashon riba término largu debí na e nivel i variashon di e plannan di seguro pa polítikonan di e paisnan’.

Segun Minister Silvania e direktornan a bisa ku mester por adaptá e suma stándar pa medio di un dekreto ministerial. Tambe nan a para ketu na algun komponente di salario ku na nan opinion mester ta ekskluí for di e stándar, manera por ehèmpel gastunan pa outo. “Gobiernu a indiká na nan ku esaki ya ta asina kaba. E gastunan di outo no ta forma parti di salario.”

Mas aleu gobièrnu ta ninga ku Minister Silvania a risibí un proposishon dje direktornan di NV-nan di gobièrnu pa bende akshonnan dje empresanan pa paga e fiansa na Hulanda, ya Hulanda no ta pone preshon mas riba tratamentu dje LNT i imponé redukshon riba e salarionan dje direktornan. “E Minister no a risibí tal proposishon.”

Login