Willemstad – Den un reunion na Den Haag  dia 16 di mei 2023 Minister di Hustisia, sr. Shalten Hato a 1sera konosi ku Minister di Defensa di Reino, sra. Kasja Ollongren. Den e reunion di orientashon i alabes di trabou a toka diferente tema manera entre otro e situashon geopolitiko den region, asistensia di Koninklijke Marechaussee (KMar) den kuadro di e proyekto di fortifikashon di nos frontera, desaroyonan pa ku Milisia di Kòrsou (CURMIL) i naturalmente a papia tokante di Warda Kosta.

Wardakosta pa Reino Hulandes, manera ta ampliamente konosi, ta un areglo di koperashon entre e paisnan den Reino Hulandes. E koperashon aki a keda regla den un asina yama Lei di Reino. E tempu ei a palabra un repartishon di e kostonan entre Antias Hulandes, Aruba i Hulanda i desde e disolushon di Antias Hulandes na aña 2010 partidonan a palabra un repartishon nobo dedusi di porsentahe pero nunka no a wordu formalisa of ankra den e Lei di Reino aki.

E mandatarionan a papia tokante e akuerdo gubernamental (e asina yama ‘Bestuursakkoord’) i a kombini ku lo negosha tokante e suma di 3.84 mion euro ku Korsou mester a kuminsa paga adishonalmente den 2023 pa kumpli ku e akuerdo gubernamental aki. A palabra ku lo duna e grupo di trabou di ámtenar espasio pa bini ku un proposishon riba plaso korto ku país Korsou por karga.

Minister Hato a duna di konose na Minister di Defensa Hulandes ku ta un bon momento pa (re-)evalua e Lei di Reino ku ta trata Wardakosta, mirando ku e lei ta unu bieu i ta data for di (prome ku) 2010, ku e meta pa mehora esaki kaminda ta nesesario. Den e kuadro aki minister Hato a enfoka ku entre otro mester wak tambe e asina yama ‘verdeelsleutel’ ku tin mara na e Lei di Reino aki i formalisa esaki debi ku aparantemente esaki no a tuma luga na 2010. Partidonan a kumbini ku un ke otro lo ser elabora den Presidio di Wardakosta pa determina kon ta bai atende e revishon aki riba plaso medio.

Banda e e topiko aki e mandatarionan a papia riba e bon koperashon ku tin ku Koninklijke Marechaussee (KMar) i ku riba plaso korto 18 hoben lokal lo wordu forma komo Marechaussee Beveiliger. Minister Hato a ekspresa su gratitut ku e inisiativa aki pa duna hobennan lokal un oportunidat pa forma parti di Koninklijke Marechaussee (KMar).

Tambe e minister di Defensa a bisa ku e ta para tras di e plan pa ekspande Milisia di Kòrsou (CURMIL) i ta deliberando tokante e edat ku e grupo aki mester sali for di e kuerpo aki pa asina brinda nan mas perspektiva tantu den marina mes pero tambe pa nan por flui mas fasil den e aparato gubernamental lokal mas miho prepara.

Por ultimo e mandatarionan a para ketu na e strategia di seguridat pa Reino Hulandes 2023-2029 ku resientemente a keda formula ku envolvimentu di diferente organisashonnan publiko den tur parti di Reino i esaki según Minister Hato ta mustra e forsa di Reino Hulandes.