Juliette Mendez, hefe di servisio na kliente di SSC,  ta informá ku dia 26 di yüli alrededor di 150 pa 160 studiante a bai afó pa bai studia.

WILLEMSTAR, — Durante di un Podcast Hustisia Siguridat i Abo, Juliette Mendez, hefe di servisio na kliente di SSC a splika ku tur aña tin un grupo grandi ku ta bai studia den eksterior. Kada na ta un eksperensia pa e studiantenan i tambe SSC.

Dia 26 di yüli último studiantenan ku a bai afó pa bai studia. No ta nesesariamente tur ku a apliká pa bai afó a bai pero ta pendiente pa wak kuantu studiante ta bai al final. Te ainda gran mayoria di studiante ta bai Hulanda. Hulanda ta hopi mas fásil ya komo tin studiante tin famianan na Hulanda, studiantenan tin nashonalidat Hulandes i e trámitenan pa Hulanda ta hopi mas fásil kompará ku den region, Juliette Mendez ta splika. Tambe Hulanda ta mas barata den sentido di lokual bo ta haña di finansiamentu ku ta kubri tur e studiante su gastunan di estudio i biba. Juliette Mendez ta informá ku Hulanda ta e lugá ku studiantenan ta bai studia mas tantu. Pa loke ta trata den region esaki ta Merka, despues Costa Rica, Canada i Colombia.

Costa Rica ta kaminda e hóbennan ta bai studia medisina i na Colombia dentista. Lokual e hóbennan ta bai studia na Merka òf Canada ta hopi mas diversifiká, segun Mendez. Ora studiantenan bai afó, SSC ta finansiá un estudio ku no tin den region. Esaki tambe por influenshá unda e studiante ta bai studia. Finansiamentu di estudionan riba kondishon ku no tin e estudio aki na Kòrsou ta nesesario paso mester konserva i protehá estudionan ku gobièrnu ta duna supsidio pe. Si studiantenan por prueba ku tin un skol na Kòrsou ku tin un estudio pero ku e studiante ta preferá hasié na otro lenga tambe e studiantenan ta haña oportunidat pa bai studia afó.

Formashon ku studiantenan ta haña promé ku nan bai

Lokual nos ta pensa semper ta kiko ta e situashonnan ku e studiante por haña su mes den dje ora e bai biba afó, Juliette Mendez, hefe di servisio na kliente di SSC ta splika. E studiante por kushina? E por manehá su sèn? Mayornan ta prepará pa laga bai di nan yunan? Di parti SSC a hasi un seshon virtual kaminda a inkorporá studiantenan ku ta bai studiá afó i nan mayornan den un diálogo ku studiantenan ku a kaba di studia  i òf studiantenan ku ta bibando afó na e momentunan aki. Tambe SSC a haña grabashon di studiantenan den kual e studiantenan ta konta di nan miedunan i dikon nan a skohe pa SSC. Nos tabatin un seshon tambe di droga, sex, i alkohòl. Esaki ta nesesario paso e studiante mester ta prepará pa e sa kon no pa kai den sierto tentashonnan na momentu ku nan bai biba afó, Mendez ta informá.

Tambe e studiantenan ta haña informashon di kon e studiante por kuida su mes for di esakinan. Ainda SSC ta hasi uzo di e sistema di mentor di kual tin gruponan di mentor i “oudejaarsstudenten” ku ta risibí e studiantenan na Hulanda. Di parti di Banko sentral ya pa 4 aña kaba, ta duna sosten pa studiantenan haña informashon di sistemanan di pago, problemanan sibernetiko, krepto money kual ta trènt nobo ku hóbennan por kai den tentashon den dje. Mendez ta splika ku tambe studiantenan ta haña informashon tokante di e dia di e buelo i kosnan ku tin ku tene kuenta kuné na airopuerto.

Informashon bùrsalen tabata disponibel pa tur hóben  

Representante di Curcaçao Airport Partners (CUR), Fayna Sleur-Haseth ta splika ku e hóben ta un pasahero normal riba e dia aki i ta importante pa e hóben sa kiko si i kiko no e por bai kuné, Haseth ta informá. Ora kosnan pasa den mashin por habri bo paketenan di e studiante pa hasi kòntròl. Si e studiante ke sa kiko si i kiko no por bai kuné e hóben tabatin e posibilidat di informá su mes i hasi preguntanan via página di airopuerto riba Curaçao International Airport Facebook di kual ta dirigí un persona konserní pa kontesta preguntanan di e studiante. Genesis Cardose-Sint Jago, representante di Curcaçao Airport Partners (CUR), ta bisa ku dia di bùrsalen ta un dia speshal pa studiantenan i famianan pero pa airopuerto e operashon tin ku sigui normal.

 Si e studiante bin trempan dia di su buelo tin tempu pa kumindá famia i òf sinta kome algu i e studiante no tin ku hansha, Cardose-Sint Jago ta splika.  E aeropuerto di awor aki ta un aeropuerto hopi mas drùk i pues e manera ku tabata risibí studiante ántes lamentablemente no ta eksistí mas. Ántes tabata bin graba, hende ta bin kanta, pastor tabata duna palabra i hopi studiante no tabata gusta esaki ya komo e ta traha riba nan emoshon, segun Juliette Mendez, hefe di servisio na kliente di SSC ta splika. Pues pa e motibu aki a konsehá famianan pa tuma despedida for di un dia promé di e studiante na kas. Tambe a konsehá studiantenan pa no tuma nada serka niun hende promé ku nan buelo. Lokual ta trata di bistuario a konsehá hóbennan pa bisti simpel i konfortabel, Fayna Sleur-Haseth ta splika.

Studiantenan ta bini bèk despues di bai studia afó?

No tin sifra di e kantidat di studiantenan ku ta i òf a bini bèk. Den e parti di kobransa ta ripará ku hopi studiante ta bin bèk Kòrsou pero gran parti tambe ta keda na Hulanda debí ku ta preferá e eksperiensha di trabou pa paga nan debenan bèk òf un trabou ku ta ekivalente na e añanan ku nan a traha, Juliette Mendez, hefe di servisio na kliente di SSC ta splika.

Segun Fayna Sleur-Haseth, representante di CUR Por bisa ku mayoria studiante ta keda na e pais ku nan a bai studia pero hopi tambe ta bini bèk voral ke bùrsnan ku tin awor aki ku ta brinda oportunidatnan di trabou. Por mira si ku Kòrsou ta hasiendo di su banda pa yuda atraé esnan ku a bai studia pa bini bek. Hefe di servisio na kliente di SSC, Juliette Mendez ta splika ku hopi studiante ku ta keda biba afó debí ku na Kòrsou e trabou no ta mesun pisá ku lokual nan haña den eksterior. No ta mira esaki nesesariamente komo algu malu, ya komo e studiante ta ekipá su mes pa mundu. Ta importante pa e studiante profeshonalisá su mes i hasi lokual e ta gusta. Ántes tabata pusha yunan pa studia i òf traha karera den algu spesífiko, pero si e studiante ta studia lokual e ta gusta e ta kabé.