Sanger: funshonarionan di RST a bula riba su lomba, bringa kuné lagando e parlamentario su kamisa na sanger.

Nieuwe Haven, — E kaso di Low Martines, na Yüni próksimo ta bira unu interesante. Low ta preparando un atake fuerte riba RST, kende for di inisio segun e eks parlamentario a maltrat’é durante investigashon.

Siman pasá djabièrnè, Korte Penal den Promé Instansha mester a trata e kaso preliminar sin bai den muchu detaye, pero sorpresivamente fiskal di Ministerio Públiko sra. mr. vd Zee a presentá e kargonan kontra di Martines den bastante detaye, lokual a kue tantu Martines komo su defensa for di base. Un hecho ku atrobe a pone Martines reakshoná den korte, alehando  ku Ministerio Públiko ta bolbe kibra ku regla den su kas.

Durante su presentashon pa oponé un libertat temporal den kaso di Martines, e fiskal a menshoná ku Martines a kibra dos telefon. Segun e fiskal, esaki a sosodé durante e periodo di investigashon den un enkuentro ku Martines, pero nan a logra rekuperá e datosnan riba e telefonnan. E vershon di Martines ta otro, kreando un konfushon mirando ku e fiskal a krea e impreshon ku en todo kaso Martines a kibra e telefonnan. Segun Martines, e la kibra e telefonnan, despues ku “nan a lag’é” tur na sanger. Tabata durante di su detenshon, nan a bringa ku Martines e suseso mester a tuma lugá. Martines den deklarashon na Vigilante: “Durante di mi detenshon ku nan a bringa kumi, lagando mi tur na sanger, mi a rabia i hisa mi telefonnan dal nan abou kibra den mi kurá di kas”.  E kamisa esta e wayabera tur na sanger ainda mi tine i segun mi e sanger ta di e dama reshershi kua  bula riba mi lomba chokami sin niun motibu”.

Segun fiskal di Ministerio Públiko vd Zee, Martines a kibra e telefonnan, lagando atras un impreshon ku esei a tuma lugá durante interogashon i tambe ku tabata un akto konsiente. E fiskal no a duna detaye kon e kosnan a a tuma lugá. Riba 5 Novèmber na momento  ku e funshonarionan hudisial a presentá na kas di Low Martines, a surgi un forsageo unda hasta a bula riba lomba di Martines pa kontrol’é. E forsageo a resultá den un protesta físiko di Martines i durante di su rabia e la dal tur su telefonnan abou kibra. E interkambio físiko a laga Martines  su kamisa tur na sanger.