Back to Top
Vigilante banner image

Mal uzo fondonan Covid por ta motibu pa Hulanda rechasá opsekio


December 1, 2023 • 3 minüt pa lesa

Eks presidente di Cft na 2020 a manda un karta kual a yega Hunta di Minister di Reino, unda e la afirmá ku Kòrsou a mal uza fondonan di Covid.

PUNDA—Definitivamente, Gobièrnu di Kòrsou entre 2019 pa 2022 a mal uza fondonan ku Hulanda a pone na disposishon pa Covid. Kalkulashonnan ta indiká ku miónes ku tabata destiná pa kubri kostonan okashoná pa Covid, a bai pa gobièrnu paga retraso den su gastunan ku no tabatin nada di haber ku Covid

Esaki por ta unu di e motibunan pa kual Hulanda a deshasí for di e idea pa duna parti di e sosten den forma di opsekio. Ta asina ku e komportashon di Kòrsou riba maneho finansiero durante periodo di Covid i aplikashon pa Fondo di Sosten a lanta e duda unda Cft mester  a konsehá pa pone mas kondishon. Dos karta ku Cft i nan eks presidente Raymond Gradus a manda pa eks sekretario di estado, Raymond Knops ta bisa tur kos. Gradus a konkluí ku Kòrsou a uza reserva den Fondo di Sosten pa paga otro gastunan ku no tabata “vital”. E ponensha di Gradus ta stipulá den un karta ku a bai Hunta di Minister di Reino

A uza fondonan di Covid pa paga gastunan operashonal manera, salario di ámtenar, loontrede, kostonan di servisio i produkto, pagonan di supsidio, seguro sosial i finalmente pago di interes i kota di fiansa. Ku eksepshon di salario, ningun pero ningun dje otro kategorianan di gastunan riba e

presupuesto di likides tabata basá riba nesesidat pa un medida urgente.  Un análisis mas mihó di e presupuesto di likides ta mustra ku gobièrnu di Kòrsou a pre kalkulá un défisit di likides na final di aprel 2019 di 318 mion florin sin e saldo inisial positivo na aprel. Esaki tabata 65 mion florin. E défisit práktiko na final di aprel, kitando e saldo inisial lo sera na 253 mion. E défisit ta inkluso un pago di 115 mion na pakete di sosten. Kitando e pakete di sosten for di défisit práktiko ta resta 138

mion. E 138 mion ta nifiká e défisit ku gobièrnu lo manten’é, sin e pakete di sosten. Inkluí den e 138 mion florin gobièrnu a kalkulá 1. 15 mion èkstra pa paga retraso di APC. 2. 39 mion florin na pago èkstra na SVB. 3. 26 mion na supsidio i transferensha. 4. 26 mion na interes di kota di fiansa

Cft den nan rekomendashon na Hunta di Minister di Reino, RMR, a splika bon kla ku Kòrsou a hasi di mas den petishon miéntras nan no a konsiderá aktua konforme Akuerdo di Kresementu. Den nan petishon pa finansiá e fondo di emergensha Gobièrnu  di Kòrsou a laga traha un estado di likides, simplemente bisá kompletamente sin  bèrgwensa. Cft a konkluí ku na promé lugá, a manda un kalkulo di salario públiko di 56 mion florin for di kual tabata inkluí retraso riba pago di penshun, ku no tabata di vital importansha pa súplika sèn pe. E sèn tabata pa paga APC. Vigilante ta konkluí ku ta trata di por lo ménos 15 mion èkstra  Kòrsou a pone den nan kálkulonan di gastu riba retraso di penshun. Cft korektamente ta konkluí ku retraso den penshun NO ta prioridat pa paga den momentunan di krísis. Mas aleu ta kalkulá ku gobièrnu a inkluí den su  kálkulonan un oumento di kasi 50 mion florin na pago di SVB entre aprel pa mei.  Esaki tampoko Cft korektamente no a aseptá debí ku no tin niun klase di kòntròl  riba e instituto sosial. Cft ta opiná ku gobièrnu mester a adaptá su gastunan i pone bon prioridat pa lokual ta trata Covid.

E impreshon di Cft, den su kartanan di 2020 na Hunta di Minister di Reino i na Raymond Knops ta konfirmá nan deskonfiansa den e maneho finansiero di Kòrsou. En realidat, Kòrsou no tabatin mas opshon. Kobrando 400 mion ménos na entrada di impuesto debí na Covid, mirando ku Turismo (-32%) Bunkering (-17%) i Refinashon (-7%) ta fo’i  operashon, por kalkulá ku riba 50% di nos kontribushon na e Produkto Nashonal Brutu tabata afektá. Mester a tene kuenta ku un relashon dirèkt entre e efekto riba Produkto Nashonal Brutu i bahada den entrada na impuesto. Esaki a nifiká por lo ménos 27%% ménos na impuesto riba salario (loonbelasting) i di benta (omzetbelasting).

Durante Covid, Kòrsou a fia 911 mion florin. Hulanda a konstatá ku gran mayoria di e sosten na likides a bai pa Gobièrnu di Kòrsou paga kostonan retrasá. Esei por ta unu di e motibunan prinsipal pa no papia mas di opsekio sino di un fiansa.

Login