Punda—Vigilante a tuma nota ku e kantidat di maltrato kontra animal nan aki na Kòrsou ta oumentando drástikamente.

Tin vários kachó i  pushi ta keda maltratá aki na Kòrsou. Loke ta referí ku maltrato ta sea e animal nan ta wòrdu neglishá dor di nan doño, ta dal nan ku outo, wòrdu venená òf keda sin duna nan alimentu sufisiente ku konsekuensia ku e bestia ta kai den mal estado. Tin vários imáhen i video di animal nan maltratá ku ta sirkulando riba ret nan sosial.

E animal nan aki tin mesun privilegio di biba ku un hende. No ta paso e ta un animal mester maltrat’é , e tambe tin sintimentu meskos ku un hende. Vários fundashon i persona nan individual ta hasiendo nan máksimo esfuerso riba nan mes pa por salba un animal ku nan mira ku ta pasando den un situashon di maltrato. Pero dia pa dia e kantidat di animal maltratá ta oumentá mas i mas.

E fundashon nan ta kansa di e in- hustisia ku tin kontra animal na aki na Kòrsou, i ke sa kidia ta hasi algu ku e situashon aki. Dia 7 di Desèmber último algun persona a bin topa ku un kantidat di 6 kachó di rasa Pitbull venená i di dùmp atras na Bullenbaai. Esaki ta unu di e kos nan ku mester stòp di hasi segun e organisashon nan. Kada unu di e fundashon nan i tantu e voluntario nan ke hustisia pa kada unu di e animal nan ku a keda maltratá i tambe ke pa komunidat ta na altura ku kada animal tin sintimentu meskos ku nos.