Abogado mr. Kid Martina no a oponé na e demanda di fiskal paso segun e su kliente a koperá i tabata habri pa splika kon tur kos a bai i su kliente ta di akuerdo ku e demanda ku fiskal a hasi

Nieuwe Haven— Ayera korte penal a trata kaso kontra di e dama D.V unda ku ta akus’é di a estafá Hof un suma alrededor di 67 mil florin. E dama  kometé e akto aki den e periodo di Yanüari 2018 pa Desèmber di aña 2019.

Ta akusá e dama aki ku den e periodo ariba menshoná un òf mas biaha, lo a hasi mal uzo di su funshon komo  empleado atministrativo den departamentu di finansiá na HOF.  Durante e periodo di Yanüari 2018 pa Desèmber di aña 2019 e dama aki tabata tuma e komprobante nan di pago pa por a stòrt esaki nan riba un kuenta pero no a hasi esaki. Na momentu ku e dama aki tabata risibí e pago nan e tabata kue e prueba di stortin i tabata warda esaki un kaminda i e sèn e tabata bai kuné.  E  dama aki a hasi mal uso di su funshon i a kue sèn vários biaha ku a pone ku e montante a bira un suma di 66.987 Mil florin.

Durante tratamentu di e kaso ayera den sala wes a puntra e dama  kiko tabata e motibu ku a pone a kometé e akto aki. E dama a indiká ku e la hasi esaki debí ku e tempu ei e tabatin problema nan finansiero paso e tabatin un pareha pero e ku e pareha a separá pues ku a pone ku e la hañ’é ku vários kos pa e paga riba su mes. E la hasi esaki tambe pa asina por a duna su yunan di kome i paga nan skol. E la splika ku pa e ta hopi importante pa su yunan por tin di kome i tambe skol di su yu nan ta hopi importante pe. Wes mr. Verbeek a puntr’é ku si e ta konsiente si ku no ta trata aki si un suma chikí si no unu basta grandi i ku esei ta nifiká ku no ta un biaha so e la kometé esaki si no vários biaha.

Wes a splika ku e ta komprondé ku e la preokupá pa e yunan por tin di kome pero e sèn no tabata di dje i ku e no por a mishi ku esaki sabiendo ku no ta di dje. E akusado a splika ku e ta arepentí pa loke ku e la hasi pero e temporada ei kosnan tabata kana hopi malu pe. E la bisa wes ku si e lo por haña un kastigu di trabou paso e lo no por bai enkarselá, paso esaki lo bai tin un efekto hopi grandi riba su yunan.

Fiskal mr. Leepel a bisa e akusado ku e la splika ku e la kue e suma di plaka aki pa por a duna su yu nan di kome i esei ta komprendibel, pero dikon e no por adaptá su mes na e salario ku e tabatin i bai na supermarketnan barata pa asina e sèn por a yega. E dama a splika ku e no ta un persona ku ta gasta sèn na kosnan karu pero e sèn tabata pa mas bien e debe na banko ku e tabatin. Fiskal a indiká na dje ku e ta haña lokual ku e la hasi hopi grave mirando ku trabou tabata konfi’é i e la kibra e konfiansa aki.

Fiskal a splik’é ku e no sa ki kastigu lo ta esun ku ta kuadra pa e akusado mirando ku e no tin karchi kastigu, pero lokual ku e la hasi ta algu ku e mester risibí un straf pa e si. A kompará su kaso ku unu di St.maarten unda ku un trahadó a estafá un suma basta grandi tambe di plaka. Fiskal a hasi un demanda di 240 ora di trabou si e no kumpli òf no hasié bon mester wòrdu enkarselá pa 120 dia, 1 aña di prizòn kondishonal i mester sigui kurso kon pa dil ku bo presupuesto. Tambe e dama lo mester bai kaba di paga e suma di plaka ku e la estafá. Ya e akusado a paga 12 mil florin kaba i e falta e 55 mil pa por kaba di paga.

Abogado di e akusado kende tabata abogado mr. Kid Martina no a oponé na e demanda di fiskal paso segun e su kliente a tabata habri pa splika kon tur kos a bai i su kliente ta di akuerdo ku e demanda ku fiskal a hasi. Wes a dikta sentensia mesora den e kaso i a splika e akusado ku lo ke e la hasi no tabata bon i p’esei e mester risibí un kastigu i ku e tambe ta di akuerdo ku e demanda di fiskal.