Back to Top
Vigilante banner image

MAN/PIN: “Preshon riba inspekshon di impuesto pa kobra ma yèyè na brutu!”


June 25, 2024 • 3 minüt pa lesa


WILLEMSTAD—–Den un publikashon di 20 di yüni 2024 den e korant AD nos a tuma nota di un públikashon den kua minister Silvania ta indiká ku Inspektor di impuesto, no ta funshoná segun su instrukshon. E minister ta bisa segun e korant: “U heeft niet voldoende gehoor gegeven aan de instructie om vóór 1 juli minimaal 60 procent van de IB -aanslagen(inkomstenbelasting) voor 2023 op te leggen door middel van automatische Adaf-runs en het massaal opleggen van aanslagen. Evenmin heeft u voldaan aan de doelstelling om minimaal 80 procent IB-aanslagen over het jaar 2020 op te leggen”

Na Papiamentu:

Bo no a duna sufisiente atenshon na e instrukshon pa imponé por lo ménos 60 porshento di aanslag di impuesto riba entrada (IB) pa 2023 promé ku 1 di yüli dor di uso di Adaf-runs i imponé aanslagnan di impuesto masalmente. Tampoko bo a kumplí ku e meta di pone un mínimo di 80% aanslag di e impuestonan di IB pa aña 2020.

Mes dia, riba Facebook, minister ta pone e siguiente post den kua e ta akusá Ontvanger di no ta kobra e grandinan ku debe miones m ata kobra Ma Yèyè dor ya dos plaka:

For di e sifranan suministrá pa minister Silvania mes, por mira ku e personanan ku debe mas ku un mión na belasting, ta ni un ½(mitar)  porshento di e pagadonan di belasting.  

Tambe nos ta mira ku e personanan ku debe entre f. 5000 – pa f. 10.000 ta 6.5 %di pagadonan di impuesto; i esnan ku debe menos ku f.5000 ta 64.2 porshento. Huntu esnan no ta debe sumanan grandi ta 70.7 % di tur pagado di impuesto.

Si konsiderá ku Ma Yèyè su debe por ta lo maksimo 50.000 florin i nos konta e personan den e grupo di 10.000 pa 50.000 di debe aserka, ku ta huntu 21.4 porshento di pagador di belasting, e grupo ku nos ta yama Ma Yèyè ta bira 92,1 % di nos pagadonan di impuesto.

Ta kon e instrukshon na Inspektor ta pa pone aanslag pa kobra minimal 60% di hende riba e aña 2023 i 80% di hende riba aña 2022 anto riba Facebook ta pretendé ku Ontvanger mester spar Ma Yèyè? Kaminda bo ta bisa den korant ku ta bo mes a manda pone aanslag masal riba e pueblo?

Dikon e instrukshon na Inspektor no ta pa konsentra riba e top 5 % di debedonan di impuesto?

Den korant Minister ta skohé pa tira falta riba Inspektor ku e no a pone aanslag pa kobra Mai Ma Yèyè i riba Facebook e ta pretende ku ta Ontvanger no ta kobra e debenan mionario. Esaki ta un kontradikshon i manipulashon di marka mayó. Atrobé minister ta pone nos servisionan di impuesto den lus negativo, pa e buska popularidat

Konklushon:

E instrukshon na Inspekshon ta nifiká ku minister ta pone preshon riba e masa di henden, esta e hendenan ku debe mas chikí te 50.000,- florin (77.813 cribnummers) i ku huntu debe fl.216.091.324,  ku ta menos hende ku e kantidat di hende (334 cribnummers) ku debe 1 mion florin of mas, esta fl. 1.030.178.908 (mas ku 1 míyar) i no manera e la mal informá riba su Facebook ku ta riba esnan ku debe grandi mester bai! Ta riba Ma Yèyè e ta bai anto na brutu!

P’esei Frakshon di MAN-PIN den parlamento a hasi e siguiente pregunta na Gobièrnu:

  1. Minister a tuma nota di e artikulo den AD di 19 di yüni 2024, ‘Reprimande Inspecteur’ (wak anekso 1)?
  2. E artíkulo den AD ta deskribí un instrukshon di parti di minister pa kobra mas belasting i ta duna diferente sifras. Ta bèrdat minister a duna e instrukshon manera formula na Inspektor di belasting? 
  3. Si e instrukshon manera deskribí den e artíkulo den AD no ta kuadra ku bèrdat, minister a duna un tipo di instrukshon asinaki i kiko e ta eksaktamente? Nos por haña un kopia? Òf minister no a duna niun instrukshon manera formula den e korant?
  4. Si minister a duna e instrukshon deskribí den e artikulo di AD na Inspektor, e instrukshon aki no ta kontradisí e post di minister di 20 yüni 2024 riba Facebook (wak anekso 1) ku ta ekspresa ku mester kobra esnan ku debe di mas ku 1 mion promé?

  5. Ta posibel pa Inspektor kumplí ku e enkargo di minister, si e instrukshon formulá den AD ta korekto, bou e kondishannan eksistente di personal i sistema elektroniko den e organisashon, esta den otro palabra, ta posibel pa pone e kantidat di aanslag ku segun e artikulo minister ta eksigí basa riba kantidat di personal i e sistema elektroniko di forma responsabel?
  6. Ora pone aanslag di forma outomatiko, e konsekuensia ta ku e ta genera un kantidat grandi di bezwaarschriften. Inspekshon ta ekipá pa por atendé e kantidat di “bezwaarschriften” ku lo surgi?
  7. Minister tin pensa pa bolbé bin ku ‘kwijtschelding’ ora e realidat presenta ku e aparato no por handle un kantidat grandi di “bezwaarschriften” organisashon?
  8. Minister ta responsabel pa kobransa di impuesto, minister por duna parlamento un kopia di su instrukshonnan na Inspektor di inisio di su enkargo komo minister te awor, entre otro pa kobra esnan ku debe belasting mas ku 1 mion promé?
  9. Dikon no a kontinuá ku e proseso pa pa integrashon di Inspekshon, Ontvanger i SBAB ku hustamente mester a kontribuí na alsa efisiensia o efektividat di aanslag i kobransa?
  10. Minister por informá Parlamento kuantu ta total di impuesto risibí te ku fin di mei repartí entre diferente sorto i kon esaki nan ta kompará ku sumanan presupuestá?


Login