Mientras promé minister ta skondé i minister di Finansa ta baila ‘wasmashin’.

Willemstad—–Curaçao Medical Center (CMC) ta bai kumpli 5 aña dia 15 novèmber awor i 5 aña largu kaba e instituto tin reto hopi serio pa kumpli ku nan tarea di garantisá kuido responsabel na komunidat. Un situashon ku no por kontinuá i ku gabinete MFK/PNP último 3 aña no a hasi nada pa trese solushon struktural den dje.

Bou di e aktual gobernashon ku a tuma asiento na 2021 a firma un “hoofdlijnenakkoord” ku CMC ku ta enserá entre otro ku ta laga ofisina di akountent KPMG hasi diferente investigashon na CMC pa asina haña bista den operashon, efikasia i gastunan di CMC. KPMG a kaba ku su investigashonnan i a skibi diferente rapòrt, pero awor ku e rapòrtnan ta kla gobièrnu mes ta kibra e palabrashon i no ta ehekutánan i hasi esakinan pùbliko pa tur hende tuma nota di e kontenido.

Minister Silvania tin kustumber di buta ràportnan interno i èksterno riba FB.

Den e rapòrtnan aki tin rekomendashon pa solushoná e problemanan di CMC di forma struktural i ta urgente pa e hòspital disponé di esakinan i pa huntu ku gobièrnu i tur otro stakeholder traha riba solushonnan konkreto. Ta den e kuadro aki MAN-PIN ta puntra su mes kiko ta e motibu ku CMC no por haña e rapòrtnan aki.

Kisas ta pasobra e rapòrtnan ta yega na konklushonnan ku gobièrnu no ke tende di dje? Ta dje haltu ei e grado di imadures di nos gobernantenan ta ku nan no ke atmití ku mester atendé di otro forma ku CMC pa asina garantisá kuido na nivel na Kòrsou?

MAN PIN ta konstatá ku Komishon Supervishon Finansiero ‘Cft’ a atvertí minister di Finansa, Javier Silvania na hopi okashon ku e mester sòru pa finansiamentu di e presupuesto médiko di CMC. E minister sinembargo ta preferá balia, hasi prèt i pèrdè tempu ku kanga saya ku Kontrolaria General riba Facebook, mientras kuido na hospital ta kore peliger serio!

17 spesialista ta bandoná hospital. Si den 1 pa 2 siman no presentá ku un solushon finansiero tin ku para operashon elektivo atrobe. Tampoko lo tin sèn pa paga proveedó loke ta krea skarsedat di material. Asta pago di salario di e personal ta na peliger.

MAN-PIN pa e motibu aki ta urgi promé minister Gilmar ‘Pik Pisas pa stòp di skondé i tuma rienda di su gabinete! Sòru pa minister Silvania atendé ku e “Hoofdlijnenakkoord” di novèmber 2022 konforme palabrashon hasí ku CMC.

Minister di Finansa hasta no ta kumpli ku sentensia di Korte di Hustisia pa paga CMC gastunan di transishon. Promé minister ta kiko

Promé minister ta kiko bo ta warda riba dje pa tuma rienda i duna òrdu na minister Silvania pa kumplí ku CMC? Te ora nos pueblo no tin kuido mas?