Back to Top
Vigilante banner image

Maneho di efektonan kousa pa Covid ta prioridat pa Gobièrnu na St Maarten


September 16, 2021 • 2 minüt pa lesa

Alrededor di 40% di e poblashon di Sint Maarten aktualmente ta bakuná,
kual ta ménos ku mitar di e ophetivo (85) ku Gobièrnu di e pais ke logra.

PHILLIPSBURG- Durante apertura di e aña parlamentario nobo na Sint Maarten, gobernador Eugene Holiday a anunsiá ku maneho di efektonan kousá pa e pandemia di Covid-19 ta prioridat number 1 di Gobièrnu.

Mirando e oumento di solisitut pa yudansa finansiero, Eugene Holiday a duna di konosé ku Sint Maarten ta den nesesidat di mas programa e aña aki pa superá e pèrdida di ingreso na e pais. Ademas, Holiday ta anunsiá ku lo mester krea mas oportunidat ekonómiko pa personanan den nesesidat komo konsekuensia di e krísis aktual.

E último lunanan Sint Maarten, meskos ku Kòrsou i Aruba, ta luchando fuertemente kontra e variante Delta di Covid-19. E di kuater ola di infekshon aktual a pone un preshon inmenso riba hospital na Sint Maarten i personal médiko debí na e oumento drástiko den kasonan di infekshon i hospitalisashon.

Holiday ta bisa ku e último 19 lunanan tabata komo nunka bisto. For di komienso di e pandemia, e vírus di SARS-CoV-2 a infektá 3.979 persona, a hospitalisá alrededor di 183 persona i a kousa 57 morto, di kual mayoria e último lunanan aki.

Komo resultado, aktividatnan di gobièrnu tabata dominá i aun ta dominá pa esfuersonan ku lo yuda mitigá plamamentu di e vírus i protehá e poblashon kontra infekshon ku Covid-19.

Maske miles di persona ya a keda bakuná, miéntras tin kaso aktivo, ta fundamental pa mas persona bakuná i logra yega e tasa di 85% mihó konosí komo inmunidat kolektivo, Holiday ta anunsiá. Ademas, e ta añadí ku tur persona tin un responsabilidat individual i kolektivo pa protehá otro. E inmunidat kolektivo lo yuda trese Sint Maarten mas serka na fin di e pandemia, kual ta nesesario pa logra rekuperá ekonomia di e pais.

Login