Minister Pik Pisas a duna tur indikashon ku tin plan riba mesa pa mantené diferente playa e periodo binidero.
Punda,– Pronto gabinete Pisas II riba un forma públiko ta bai anunsiá di lo bai ehekutá diferente mantenshon na vários playa na Bandabou.
Ta trata di e playanan públiko, Sta Cruz, Jeremi i Lagun. Manera ta konosí diferente palapa i fasilidat sanitario ta den un situashon deplorabel na e playanan i pronto ta bai hasi un mantenshon grandi na e playanan aki. Den un entrevista ku minister “Pik” Pisas, e minister a splika tambe ku ta bai hasi mantenshon tambe na e bañonan na playa Kenepa Grandi. E konsehonan ku gobièrnu a risibí ta pa no mishi ku e playa aki muchu mirando ku ta trata di un dje playanan mas bunita na mundu, pero e situashon sanitario na e playa aki tambe mester drecha.
Otro proyekto ku ta pegá for di yanüari ta e rekonstrukshon kompleto di e laman na Caracasbaai. Na yanüari gobièrnu a anunsiá un proyekto di alrededor 10 mion florin pa renobá Caracasbaai i duna esaki un kara kompletamente nobo. Pero no tabata muchu moveshon den e proyekto aki. Segun Pisas, despues di e anunsio a bin resultá ku e tereno ta kai bou di RdK, pues mester a kana e proseso pa traspasá e tereno di konstrukshon pa gobièrnu. Esaki a keda lográ i pronto e pèrmit di konstrukshon ta keda otorgá. Banda di e pèrmit aki, mester bini un investigashon tokante kon e konstrukshon ta bai afektá e situashon bou di awa.
E investigashon aki no a kuminsá, pero pronto esaki ta keda ehekutá segun splikashon di e promé minister. Aktualmente ta premirando ku mas tardá aki 1.5 luna ta bai anunsiá mas públiko tur e informashon nan konserní tokante Caracasbaai pa asina sigui kana ku e trayekto aki.
Ku e anunsio ta bai tuma lugá aki 1.5 luna ta probabel debí na e preshon di parlamento pa gobièrnu responsabilisá su mes tokante e proyekto di Caracasbaai. Na fin di yüli un karta mandá pa presidente di parlamento a urgí pa invitá promé minister Pik Pisas pa duna kuenta i rason tokante Caracasbaai durante “Ora di pregunta” den sala di parlamente. E karta a indiká ku despues ku gobièrnu a anunsiá e plan pa desaroyá Caracasbaai, nunka mas parlamento no a haña mas informashon tokante di esaki.