Willemstad,– “Apesar di e kantidat di kasonan positivo ku a bin ta subi na Kòrsou, nos no mester ta spantá ku hulandesnan dor di nan gobièrnu lo keda konsehá pa no biaha pa Kòrsou.

Kòrsou ketu ba a keda ku kódigo hel, meskos ku Boneiru. Aruba ku ta kódigo oraño den e  dianan aki lo kambia i bira kódigo hel. Sint Maarten ta kódigo oraño i lo keda asina tambe”, asina e minister presidènt di Hulanda señor Mark Rutte s bisa den un debate tokante di maneho di corona den Tweede Kamer.

E promé minister a reakshoná riba e petishon di e miembro di tweede kamer Eva van Esch di (partij voor de dieren) kende a pidi pa duna un aviso negativo tambe pa biaha pa e paisnan di Karibe hulandes. “For di dos siman pasa kaba ta bálido un aviso negativo pa biaha pa eksterior, ku eksepshon di e islanan di Karibe hulandes. Nos por mira un ‘run’ riba pasashinan pa Kòrsou, miéntras ku e kontagionan ta subiendo ayanan”, asina e miembro di Tweede kamer a bisa.

“Nos no ta haña e eksepshon aki unu komprendibel i ta pidi e gabinete pa ‘trek in’ e desishon aki”, asina Van Esch a sigui bisa.

Rutte a bolbe bisa ku e konseho pa no biaha pa eksterior i esun di ta pèrmití pa biaha pa Karibe Hulandes ta kontradiktorio. “Nos a skohe pa bisa : Keda Hulanda i Hulanda tambe ta koninkrijk. Hulanda ta tambe Kòrsou, Aruba, Sint Maarten, Sint Eustatius, Saba i Boneiru”, asina señor Rutte a bisa.

Señor Mark Rutte ta rekonosé ku e situashon na Kòrsou ta kuidadoso, pero e ta bisa ku e gobièrnu a tuma medidanan fuerte pa kombatí e plamamentu di e vírùs. El a mustra na RIVM ku e desaroyonan riba e isla ta ser monitorea, pero ku na e momentunan aki no tin motibu pa un aviso negativo pa biaha pa Kòrsou.