Marlon Regales ta bisa ku tin un komishon ku ta bai tokante Campo Alegre i e persona ku sa mas di Campo alegre no ta nombrá den esaki.

Willemstad- Marlon Regales ta bisa ku Promé Minister a huza trahadónan di Campo alegre den nan doló pa kore kampaña.

E ta splika ku durante di kampaña polítiko, Promé Minister, Gilmar Pisas, huntu ku Minister Sithree van Heydoorn i Javier Silvania a reuní ku trahadónan di Campo Alegre i bisa nan ku komo Parlamentario nan no por hasi nada pero si nan vota pa Minister Pisas i pone esaki den e posishon e lo regla nan asuntu di Campo. Tambe e trahadónan aki a indiká ku Regales ta esun ku por duna un guia den e proseso di Campo Alegre debí ku e sa mas di esaki. Sinembargo Minister a lanta un komishon sin nombra Regales. E ta di opinion ku e komishon aki ta fofo i e personanan ku ta forma parti di dje no sa nada di Campo Alegre.

Anteriormente ya Regales a bisa ku ta bon pa bini un klaridat riba “Campo Alegre”. Gobièrnu a lanta un komishon pa evaluá e trafikashon i komersio humano komo si fuera ta esakinan tabata tuma lugá den Campo Alegre. Sinembargo Gobièrnu mes tabata forma parti di e proseso di kontròl. Awor ku tin un komishon instalá pa evaluá mester tira tur karta riba mesa i wak ki otro servisio mas por pèrmití.

Regales ta agregá ku awor ku ya tin un komishon instalá ta bon pa wak ki otro servisio e pueblo di Kòrsou mester, manera  servisio pa hende muhé, homoseksual, travestí i otronan. Awendia ta papia i bringa pa igualdat pues mester ofresé hende muhénan mesun oportunidatnan ku hende hòmber. E fórmula di Campo alegre ta un fórmula ku a bini ku n’e 62 aña pasá pues awor ta tempu pa bini ku un fórmula nobo kaminda no ta hasi diskriminashon di persona i ta hasi kos amplio pa tu hende. Tambe mester bini ku un plan pa si akaso haña un kumpradó i esaki indiká ku lo ke hasi Campo un kas pa hende grandi.