DEN HAAG—Siman pasa a bolbe konstatá mas kasonan di Corona. Ta trata di 4583 tèst positivo, segun RIVM.

Dos siman pasa RIVM a registrá 3805 kaso di corona. Mas pashent a keda interná (448) ku corona siman pasa kompará ku 316 dos siman pasá. Ainda RIVM no por bisa si karnaval a hunga un ròl den e oumentonan. Karnaval a keda selebrá dos wikènt pasá i komienso di siman pasá. Hendenan ku a keda kontagiá posiblemente lo a haña keho den último 7 dianan. Den suit tambe e sifranan di corona a oumentá. Pero e diferensianan den sifra ainda no ta sufisiente pa saka konklushon segun RIVM. Segun un bosero kontagionan ta oumentando pa algun siman kaba, ademas tabatin vakashon den suit, loke tambe tin influensia pa plama e virus. Ainda ta den temporada di infekshonnan respiratorio. Tin un vírùs di griep. Tin mas supvariantenan di corona den sirkulashon na Hulanda, tur di omicron. No tin indikashonnan ainda ku e variantenan nobo ta hasi hende mas malu òf ta peligroso. Siman pasa OMT a konseha pa stòp ku testmentu riba gran eskala. E vírùs a bira parti di bida diario segun ekspertonan. Ainda gabinete mester tuma desishon riba e konseho di OMT.