Back to Top
Vigilante banner image

Mas ku 90% di hòspitalisashon aktual no ta bakuná


September 22, 2021 • 1 minüt pa lesa

Ménos ku 5% di hospitalisashonnan lokal ta enserá personanan bakuná.

PUNDA- Resúmen semanal pa loke ta trata status di bakunashon di personanan hospitalisá na Kòrsou ta mustra ku aun mayoria persona hospitalisá pa motibu di Covid-19 no ta bakuná òf no ta kompletamente bakuná.

Ultimo simannan e kantidat di kaso nobo di infekshon ku Covid-19 na Kòrsou ta bahando. Sinembargo, manera ya Dr. Izzy Gerstenbluth a anunsiá siman pasá, e kantidat di personanan hospitalisá aun ta relativamente haltu.

Sifranan publiká pa loke ta kasonan nobo di infekshon ta mustra ku un total di 64 persona a keda hospitalisá ayera kual ta resultá den 490 kaso aktivo na Kòrsou. Segun publikashon di Gobiérnu sigur 1 kaso di e 64 kasonan nobo tabata importá. Pa loke ta trata hospitalisashon un total di 28 persona ta hospitalisá na CMC di kual 15 ta risibí kuido intensivo.

Tur siman Gobièrnu di Kòrsou i tim di epidemiologia ta analisá e kantidat di personanan bakuná i esnan no bakuná ku ta keda hospitalisá.

For di 22 yüli te ku 20 di sèptèmber un total di 165 persona a keda hospitalisá pa motibu di Covid-19. For di e kantidat aki únikamente 6 persona tabatin e protekshon total di tur dos bakuna, di kua 3 persona tabatin un sistema inmunológiko ku ta perhudiká. Esaki ta nifiká ku 159 persona no tabata kompletamente protehá. Análisis di esaki ta mustra ku 4 persona a risibí solamente un shòt di bakuna, 1 persona a haña Covid-19 den ménos ku 2 siman despues di su di dos bakuna i 154 persona no tabata bakuná.

Si tradusí e sifranan menshoná ariba den porsentahe, por konkluí ku na Kòrsou 96.3% di hospitalisashonnan ta bou di personanan no bakuná.

Login