Hóben: un grupo di hóben entre 19 pa 25 aña ta e sospechosonan den asesinato di Brood. Riba e foto sospechoso C.C.N. Di 25 aña bayendo dilanti un fiskal.

Rio Canario—Entre 2019 pa 2024 a tuma lugá tres krímen fatal ku mester pone Kòrsou realisá pa tene koutela riba e desaroyo di krímen. Ta trata di dos morto durante atrako i un morto durante sekuestro.

Tabata riba 7 di mei 2019 den bario di Kaya Karko 7A.  Einan den oranan di marduga, a atraká e dos asiatikon i pidi nan yabi di nan apartamento. E hòmbernan a bai e apartamento robes i momento e porta no tabata kier a habri a bai buska Pati Kabra pa forsa e porta. Ronaldus Molenaars, uj homber Hulandes Oropo ku ta traha den konstrukshon a lanta fo’i soño habri di porta topa ku e hòmbernan. Ku machete den su man, e la trata na kore ku nan, pero un grupo di hóben, a los un bala dirigí riba dje. Molenaars a bin pèrdè su bida. E tabata un pegadó di klenku i obrero den konstrukshon. 4 aña despues di su morto, Ministerio Públiko por sera e kaso Molenaars.

Un komersiante venezolano Angel Alexander Barrios Rodriquez, nasé na Venezuela di 51 aña di edat tabata pèrdí for di djabièrnè 7 di febrüari 2020. Polis a kuminsá ku un búskeda pa por a sa di e komersiante no por a hañ’é niun kaminda. Despues a bin deskubrí e hòmber bou di tera riba e pida tereno na Choloma. A keda konstatá ku a dera Barrios bibu. Ta trata di un kruel kaso unda un grupo di hòmber latino a dera un komersiante latino na bida.  Ta trata di un kaso kontra di e gang di latino “Los Lobos” ku ta akusá di a mata e komersiante Alexander Barrios. Esaki despues ku korte a dikta sentensia den e kaso i a kondena nan na 82 aña repartí entre miembronan di e geng.

Na e momentunan aki tin un grupo grandi di reshèrshi forma pa e tim di Atrako, RST i Marehaussee i sosten adishonal for di Hulanda, ta hasiendo investigashon den un kaso lamentabel unda un miembro di  tim Marechaussee ku ta laborando riba nos Isla a bin pèrdè su bida den un kaso di atrako ku a tuma den un kas na Reigerweg. Tabata djabièrnè 31 di mei 2024 alrededor di 23.43’or, Sentral di Polis a risibí yamada ku na un adrès Reigerweg  ku ta situá na Cas Coraweg bisiñanan a tende un dama ta grita pa yudansa Na su yegada, e patruya di Polis a bin topa personal di ambulans tratando na reanimá  un víktima sin éksito. A resultá di tabata,  Antonius Johannes Maria Hendrika Brood nase na Hulanda di 49 aña di edat. E víktima aki na bida tabata traha na Marechaussee i for di aña 2001 ta forma parti di e Kuerpo i a bin Kòrsou unda e la laborá tambe komo investigadó den  diferente investigashon.

Ta trata di tres krímen ku a shòk Kòrsou sin duda algun. Entre e tres mortonan, tabatin diferente kaso di asesinato, pero no durante un atrako òf sekuestro. Si kombiná e tres mortonan, i añadí e asesinato di Helmin Wiels na 2013 i kuater asesinato den anochi di 18 Mart 2017, ta señalnan bastante indikativo riba e nivel di krímen na Kòrsou. 1 polítiko, 1 polis, 4 siudadano inosente, 1 hulandes oropeo den su bibienda i finalmente 1 komersiante venezolano. Tur ta mortonan diferente i pafó di tur frontera di normalidat.

Segun tratamentunan den korte, Ministerio Públiko ta wak mas den direkshon poseshon di arma ilegal. Na mesun momento durante tratamentunan den korte, rapòrtnan di reklasering ta señalando un problema silensioso ku Kòrsou no ta mirando of no ke mira mas. Pasobra miéntras fiskalnan ta suplikando pa mas kastigu, funshonarionan di Reklasering ta suplikando pa mas guia sosial i formashon. Kisas e kousante di krímen mas indikativo di momento.

Fundashon Reklasering tin hopi aña ta gritando pa un ousilio “silensioso”. No solamente den kasonan di krímen violento, sino tambe den krímennan kontra di moralidat i abusunan seksual i hasta “incest”. Un gritu silensioso ku tin biaha ta haña e atenshon nesesario, manera den kasonan di Barrios, Molenaars, Brood, Wiels, Rasta di Fuik (Parera Moorden). Pero despues, tur kos ta normalisá i Kòrsou ta lubidá. Kisas a yega tempu pa nos realisá i aseptá ku “its gonna get worse”.