WILLEMSTAD – Parlamentario Giselle Mc William di frakshon di MAN a manda un karta ku 7 pregunta na Minister di Hustisia Shalten Hato di partido MFK tokante uso di ‘lachgas’ i sigarianan elektróniko dor di hóbennan. E ke pa e Minister splika kiko e ta bai hasi ku e problemátika akí.

E Parlamentario a manda su karta ku e tópiko ‘prohibishon di importashon i kompra di ‘lachgas’ pa konsumo komersial’, dos dia despues ku e Minister a anunsiá su guera. Mc William: “Lachgas por tin konsekuensianan grave pa nos salubridat. Serka hóbennan ku ta usa lachgas, esaki por tin konsekuensia hopi serio mentalmente pa nan. Mas usa esaki, mas grandi e probabilidat pa e efektonan negativo surgi, ta. Problemanan manera doló di kabes konstante i desorientashon, miéntras esaki ta afektá e nivel di vitamina B12 ku por resultá na daño ireversibel na serebro. Esaki segun investigashonnan sientífiko.”

Segun Mc William ta importante pa prohibí importashon i benta pa uso rekreativo di lachgas mas lihé ku ta posibel i buta esaki riba e lista di e asina yamá Opiumlandsverordening, ku ta e lei anti-droga. “Na Hulanda resientemente entrante 1 di yanüari 2023 a prohibí importashon i uso rekreativo di lachgas pa motibu di e daño ireversibel ku e t ahasi pa esnan ku ta us’é. Perotame e peliger den tráfiko pa esnan ku no ta us’é ora un otro di un manera iresponsabel a usa e lachgas i buta su bida i di otronan na peliger.”

Segun e lider di Man, tambe ta prohibí pa importá i bende ‘vape’, ku ta e sigarianan elektróniko (e-sigaretten) di diferente smak (manera mango, stròbèri, chèri, ètsetera), pa motibu ku esaki tin un efekto adiktivo bou di hóbennan i aworakí ta solamente esun di smak di nikotina ta riba merkado na Hulanda. “E motibu di adikshon bou di hóbennan pa ku e produkto akí ta altu i e ‘damp’ di e kayente dje produkto tin diferente ingrediente ku ta malu pa e sistema respiratorio i asta por okashoná kansser. Aki na Kòrsou no tin niun kòntròl di edat pa benta di e sigarianan, lachgas i shisha.”

P’esei Mc William ke sa si Minister Hato ta na altura di benta di lachgas (na eventonan, i ku hóbennan), di uso rekreativo di esaki bou di hóbennan i si Minister di Salubridat lo pone esaki riba e lista di lei anti-droga. Tambe e ke sa si e Minister di Salubridat ta na altura di uso eksesivo di e sigarianan elektróniko bou di hóbennan, i kiko e uso di tantu esakinan komo di lachgas por tin riba Salubridat. I kiko tantu Minister di Hustisia komo esun di Salubridat ta bai hasi ku e problemátika akí.

Mc William a hasi su preguntanan dos dia despues ku Minister Hato a anunsiá su guera kontra e problema akí. Ela informá ku a kuminsá e trayekto pa prohibí uzo di lachgas ku e meta pa protehá esnan ku ta uzo di esaki, en partikular nos hóbennan. “E lei pa prohibishon di lachgas ta sumamente importante mirando e dañonan permanente ku esaki por kousa serka usuarionan. For di promé di yanuari 2023 lachgas ta prohibí na Hulanda i mas pais den Oropa ta den proseso pa implementá e prohibishon aki. E prohibishon aki ta nase despues di vários investigashon sientífiko ku a konkluí ku lachgas por tin efekto severo permanente riba selebre di usuario. Mirando e tendensia ku den varios klup nokturno ta bende e asina yamá balòn ta imperativo pa un gobièrnu responsabel pone un paro na esaki.” 

E prohibishon di “lachgas” por yuda outoridatnan kompetente enormemente pa tuma medidanan inmediato kontra usuarionan di “lachgas” di forma di rekreashonal i ta kore ku bòternan di e “lachgas” den outo. Uzo di lachgas tin asta efekto riba komportashon den tráfiko di e usuario. Ku suerte, asta hopi aksidente den tráfiko por keda prevení. Asina Minister Hato a enfatisá.