Back to Top
Vigilante banner image

MCB ku wikènt di trabou boluntario Live Love Smile 2022


December 9, 2022 • 2 minüt pa lesa

WILLEMSTAD – Maduro & Curiel’s Bank N.V. e wikènt aki, di 9 pa 11 di desèmber, pa di 17 aña konsekutivo, ta selebrá e proyekto boluntario di mas grandi, “Live Love Smile” ku MCB.

Tres dia ku kolega, famia, amigu i partnernan sosial di MCB ta sirbi i kompartí amor i alegria ku diferente grupo den nos komunidat. Di un manera hopi kreativo mas ku 76 proyekto boluntario ta keda ehekutá, ku ta hasi un impakto grandi riba tur esnan ku tin mester.

Durante un antesala “Live Love Smile” ku a tuma lugá djabièrnè dia 2 di desèmber último, studiante i dosentenan di Maris Stella SBO huntu ku MCB a selebrá 25 aniversario di Willemstad riba lista di UNESCO. Nos sentro di siudat tabata esenario pa mas ku 500 alumno ku a disfrutá i eksplorá bunitesa i historia di Willemstad. Ademas 3 otro skol a disfrutá di un mainta di alegria i a hasi bishita na algun kas di grandi pa malkriá e habitantenan ku masashi, manikür, pedikür, pela i hasi kabei pa nan ta nèchi pa fin di aña. 

Durante henter e wikènt benidero, rònt Kòrsou, mas ku 700 boluntario ku ta konsistí di kolega, famia, amigu i alumnonan di Maris Stella VSBO, ta bai ehekutá proyektonan duradero riba tereno di salú i hortikultura, drecha, limpia, remodelá tereno di hunga na diferente skol i krèsh. Koleganan entre otro a lanta un “mini mall” kaminda mas ku 150 invitado di gruponan sosial por shòp, bai salon di beyesa, kome i disfrutá di un ratu plasentero.

Nos amigunan di Special Olympics a djòin MCB den un torneo spesial di Bolas kaminda 30 atleta ta bai partisipá ku un “buddy” durante e torneo riba santu na “Corendon Mangrove Beach Curaçao Resort”. Huntu ku Curaçao Lions Club ta bai distribuí pakete na diferente skol. Banda di e proyektonan ya kaba menshoná tin aktividat pa mayornan hóben, internatnan, grupo di hende hòmber, muchanan, klupnan di dama, kasnan di kuido i kasnan di grandi, i tambe diferente famia lo risibí un sosten.

MCB ta sigui “Live Love Smile” ku nos komunidat.

Login