Durante relato di dia ayera, Lesley Fer a sirbi komo representante di Promé Minister pa loke ta trata tim di krísis.

PUNDA- Durante relato di dia ku a tuma lugá ayera, Lesley Fer ku a representá promé minister pa loke ta trata tim di krísis, a duna di konosé ku medidanan lo keda alargá ku tres siman mas.

Debí ku kasonan di infekshon diario pa loke ta trata Covid-19 no ta bahando, tim di krísis huntu ku tim di epidemiologia na Kòrsou a opta pa alargá e medidanan stipulá pa prevení plamamentu di Covid-19. Esaki ta nifiká ku tur medida ku a drenta na vigor 13 di ougùstùs 2021, lo keda alargá ku un periodo adishonal di tres (3) siman i lo keda vigente te ku djabièrnè, 15 di òktober 2021. Ademas, Lesley Fer ku a bini komo representante di Promé Minister, a anunsiá ku otro siman djamars, 28 di sèptèmber 2021 lo tin un rueda di prensa kaminda Promé Minister di Kòrsou Gilmar ‘Pik’ Pisas lo ta presente pa amplia riba detayesnan rondó di e desishon pa alargá medida.

Pues pa resumí, despues di 23 di sèptèmber 2021, toke de keda ta keda na vigor di 12’or di anochi pa 4.30’or di mainta. No ta pèrmití mas ku shen (100) bishitante huntu na ningun aktividat. Tur restorant, tienda, pakus, kasino, supermerkado i otro establesimentunan ku ta duna servisio por hasi esaki segun e orario indiká den nan pèrmit ekonómiko, pero no mas lat ku 1 ora promé ku e “Toke de Keda” kuminsá. Trùknan di pan por ofresé servisio entre 7’or di anochi pa 11’or di anochi.