Willemstad,–  Durante di rueda di prensa ayera minister di desaroyo sosial señor Hensley Koeiman a splika ku SOAW a tuma over loke Krus Kòrá a bin ta hasi for di despues ku  e pandemia a kuminsá.

E ta bisa ku ta eksperensiando e pandemia aki ku tin hopi hende den situashonnan ferfelu. Ámtenarnan ta trahando bou di bastante strès, hopi preshon, pero tur esaki pa yuda e hendenan di mas nesesidat.

Minister Koeiman ta bisa ku vários ámtenar ta ser kritiká i hasta menasá inhustamente. E ta pidi  e tiki hendenan ku ta kritiká pa nan no hasi esaki ku e trahadónan ku ta hasi nan trabou i kumpli ku kriterionan ku ta ser pone pa hasi nan trabou. E ta bisa ku ta bon pa nos sa ku mester trata hende semper ku desensia nesesario, ounke ku bo ta bou di preshon.

Mas aleu señor Hensley Koeiman ta sigui bisa ku por nota ku tin vários hende ku no a mèldu ainda, paso nan ta konsiente ku nan no tin derechi di loke nan ta haña serka Krus Kòrá.

E ta bisa ku esei ta kousa desgustu, paso si kita algu for di hende diripiente, maske ku e no tabatin derechi riba dje, e por rabia. Tin hende ku tin trabou kaba i otronan ku ta haña pakete òf karchi sosial kaba i pues nan no por haña esun di Krus Kòrá tambe.

Ámtenarnan ku tin ku atendé  e petishon, mester mantené nan mes na e protokòlnan i reglanan i si e ámtenar faya e lo por pèrdè su trabou.