Resúmen semanal di hospitalisashon publiká pa Gobièrnu di Kòrsou

PUNDA- Análisis semanal di datos lokal riba infekshon ku Covid-19 ta keda prueba efektividat di bakunashon pa loke ta protekshon kontra hospitalisashon i morto kousá pa Covid-19.

Segun último publikashon di Gobièrnu di Kòrsou, entre 22 di yüli te ku 13 di sèptèmber 2021 un total di 151 persona a keda hospitalisá pa motibu di Covid-19.

Di e 151 personanan aki, 140 persona no tabata bakuná, 4 persona tabatin solamente 1 bakuna, 1 persona a haña Covid-19 den ménos ku dos siman despues di su di dos bakuna, 5 persona tabata kompletamente bakuná i un persona su status di bakunashon aun no ta konosí.

Kalkulashon den porsentahe basá riba e sifranan menshoná ariba ta mustra ku 3,3% di e hospitalisashonnan for di 22 di yüli ta personanan bakuná i 92.7% ta personanan ku no a risibí ningun shòt di bakuna.

Di e 5 personanan kompletamente bakuná ku a keda hospitalisá, 3 di e personanan aki su sistema inmunológiko ta perhudiká. Esaki ta resultá den un porsentahe di 60%.

Manera investigashon sientífiko ya a konstatá pa algun siman kaba, personanan ku un sistema inmunológiko perhudiká no ta benefisiá kompletamente di e protekshon ku e bakuna kontra Covid-19 ta brinda. Pa e motibu aki mayoria eksperto médiko inkluyendo epidemiólogo lokal, Dr. Izzy Gerstenbluth, i tambe ekspertonan di Organisashon Mundial di Salú (WHO), ta di opinion ku e grupo vulnerabel aki por benefisiá di un èkstra shòt di bakuna komo refuerso pa nan sistema inmunológiko.

Aktualmente algu mas ku 87.600 persona a risibí dos shòt di bakuna na Kòrsou i kasi 97.000 persona a risibí e promé dósis di bakuna. Segun publikashon di RIVM, esaki ta resultá den un porsentahe alrededor di 60% di e poblashon lokal ku a risibí por lo ménos un shòt di bakuna i 55% kompletamente bakuná.