Oranjestad,– Siman pasá djabièrnè tabatin elekshon aya na Aruba i MEP a resultá e partido di mas grandi. Pero aparte di MEP i AVP, e otro partidonan ku a logra haña asiento tabata MAS, RAIZ i ACCION21. Awor mester bai mira kua partido lo sinta den koalishon pa forma gobièrnu.

Promé minister demisionario, Evelyn Wever-Croes, a indiká na Hans Geerman, ku nan ta dispuesto pa traha ku tur partido, pero awor mester djis warda veredikto di pueblo. E pueblo a papia kla i nan kier un biaha mas koalishon. Wever-Croes ta enfatisá ku e úniko partido ku nan lo traha kuné ta AVP.

Esaki ta bin pa motibu ke ideologia di ámbos partido ta diferente, ya ku segun lider di MEP ta indiká ku AVP ta brasa korupshon i MEP ta bringa esaki. E lo lamentá ku si otro partido traha ku AVP, paso nan lo brasa korupshon. Loke pueblo a rechasá ta korupshon. Señora Wever Croes ta sigui bisa ku AVP ta e partido ku nan no lo traha kuné i e ta duda ku nan lo por yega otro pa un programa di gobernashon. Un di e leinan ku tin di pasa ta esun di screening i ta algu ku AVP no tabata kier hasi ora tabatin un parlamento kompleto. E ta bisa ku MEP ta dispuesto pa kontemplá kualkier otro koalishon i ta wardando pa su enkuentro ku gobernadó.

A sali riba media sosial i tin papiá riba kaya ku ya kaba tin un aserkamentu entre MEP i RAIZ. Pero Wever-Croes a desmentí esaki i lo warda riba e ronda di konsulta di partido ku Gobernadó. Despues di esei e lo apuntá un informadó, kende lo duna Gobernadó konseho kiko e ta kere ta mihó. Na e momentonan aki e promé minister demisionario Wever Cropes ta kere komo e úniko partido ku eksperiensha, den negoshá un koalishon, a duna konseho p’e partidonan konsentrá riba loke ta uni otro. Tin di bai mas den e área di polarisashon, pasobra elekshon a pasa kaba. Señora Wever Croes ta bisa ku esun ku kier realmente goberná, ta importante pa kuminsá enfoká riba e parti ku ta uni otro. Segun Wever-Croes, nan a pone un komishon ku lo evaluá tur programa di e partidonan MAS, ACCION21 i RAIZ. Esaki ta pa alinea nan band’i esun di MEP pa mira kon diferente e ta òf kiko tin den komun.

MEP-MAS

Segun e promé minister demisionario, Marisol Lopez-Tromp, lider di MAS, últimamente ta brabu ya ku el a ataka su persona hopi. P’e mandatario e situashon ta keda meskos, pasobra ora Lopez-Tromp a bandoná gobernashon, e no tabata kier a presentá reunion pa tres dia largu. Promé minister a yam’é pa papia riba e problema ku  mes a krea den parlamento, pero Lopez-Tromp no a presentá. Wever-Croes a indiká ku e no tabatin problema pa traha ku Lopez-Tromp, pasobra ora e tabatin mester di kualkier konseho, su persona tabata sinta pa papia kuné.

Pero loke a pasa a pasa, pasobra awor ta wak padilanti. E mandatario no tin problema ku ningun di nan, pa loke ta Miguel Mansur di ACCION21 a trat’é den algun debate. Pa loke ta Lopez-Tromp e ta bisa ku e sa kiko e tin na dje ya ku nan a traha huntu kaba. I Ursell Arends di RAIZ tampoko e no konosé bon ounke nan a topa otro den debate di dos gobernashon. Pueblo a papia, tin di konsiderá ku bos di pueblo ta bos di Dios, tin di pone diferensia un banda. “Awor mester konsentrá riba loke ta uni otro i saká pais Aruba padilanti”, pues señora Wever Croes.