Back to Top
Vigilante banner image

Mester adaptá hustisia na momentu ku pasa e leinan penal nobo?


June 17, 2024 • 2 minüt pa lesa

Punda,– Aktualmente adaptashon di e leinan den e kódigo penal ta den tratamentu den parlamento.

Riba djabièrnè tras di lomba parlamento di Kòrsou a deliberá tokante adaptashon di e leinan den nos kódigo penal. Relashoná ku un ouditashon dor di CAFTF ku ta mará na Financial Action Task Force ku tin komo 40 punto di rekomendashon. Mester atendé ku e rekomendashonnan pa asina atendé ku entre otro labamentu di sèn i krímen organisá.

Na aprel Raad van Advies a publiká nan análisis di e konsepto pa adaptá e kódigo penal. E oumentonan di kastigu proponé posiblemente por hustifiká un demanda di kastigu mas altu di Ministerio Públiko. Sinembargo, Konseho di Konsulta a nota ku e medida final di kastigu dje huesnan ta dependé di diferente faktor, i no tin garantia ku nan lo imponé kastigunan mas altu tòg.

Ademas RvA ta enfatisá e falta di konkordansia ku leinan den otro parti di Reino, spesialmente tokante e distinshon entre turista. E Konseho di Konsulta ta enfatisá den su rapòrt di konseho, ku tin e nesesidat pa definí e término ‘turista ku ta presente pa propósitonan rekreativo den e pais’ mas detayadamente i evitá posibel diskriminashon. RvA ta konsehá pa buska konseho serka Korte Komun di Hustisia i tambe Ministerio Públiko, spesialmente tokante e efektividat dje proyekto di lei i ehekushon di esaki.

Durante e disertashon di parlamentario Doran tokante e adaptashon di e kódigo penal, e parlamentario ta puntra kon e kódigo penal nobo lo afektá nos kadena hudisial. Doran ke sa si tin sufisiente hende pa hasi investigashon nan penal na momentu ku adaptá e lei? Tin sufisiente hende pa traha den prizòn? Tin sufisiente personal di Ministerio Públiko? I tambe den KPC?

Mas aleu parlamentario Doran a puntra konta ku e maneho riba e fondo di kriminalidat. Segun Doran, aktualmente ta dunando un impreshon ku adaptashon di e kódigo penal lo no tin ningun efekto riba e parti finansiero, pero segun e parlamentario di MFK, mester bai buska mas hende pa traha den e kadena hudisial si ke pèrsiguí hende abase di e leinan di e kódigo penal nobo. Mester mas wardadó di prezu por ehèmpel.

E adaptashon nan di e kódigo penal ta un trayekto ku ta kanando for di 2019. Diferente hues,diferente  abogado i asta ministerio públiko a duna nan punto di bista den e adaptashon di e kódigo penal. Aktualmente komishon sentral lo manda nan karta di pregunta tokante nan e adaptashon di e kódigo penal pa asina sigui ku e proseso di e lei.

Login