Oula na Banko Sentral tabata yena kompletamente ku maestronan di skol i demas ekspertonan.
Skalo— Igualdat bou di nos alumnonan ta nifiká ku no tin di haber fo’i unda bo ta bini, ken bo mayornan ta, kiko ta e medionan finansiero disponibel. Bo mester tin mesun chèns ku tur otro alumno pa por logra e potensial ku tin den bo.
Esei ta lokual a bini dilanti ayera durante presentashonnan na e último konferensha riba oportunidat igual den enseñansa i mehorashon básiko di kalidat. Eksperto lokal na Ministerio di Enseñansa Siensia Kultura i Deporte durante su presentashon a mustra ku igualdat den enseñansa ta nifiká mesun oportunidat pa tur hende/alumno. No ta distinguí den bario òf skol. Mester tin oportunidat igual pa desaroyo na e kapasidat personal. Dr. Tielman a hasi un investigashon sientífiko riba e tema di igualdat. Segun Tielman tin algun faktor ku ta influenshá e desigualdat.
Unu di e problemanan ku e la identifiká ta ku dosentenan tin prehuisio riba e studiantenan. Nan ta sali for di punto di bista ku “loke bo ta spera’ bo ta haña”, manera un profesia outo kumplí. Den kuadro di e pensamentu menshoná, ta nifiká si un dosente ta pensa ku un alumno por yega te na sierto nivel, ta einan e ta hib’é tambe. Segun Tielman lo ta hopi bon pa dosentenan lokal ta konsiente riba e persepshon i manera di mira nos alumnonan. Segun Kennedy, no por generalisá i spera mesun desaroyo pa kada alumno. Mester trata semper di purba na imponé un nivel alkansabel i laga e alumno trata na yega e nivel.
Un aspekto importante ku Profesor dr. Daniel van Vuren (SEO Hulanda a menshoná durante su presentashon ta ku e alumno na Kòrsou tin hopi kargo. Aparte di bai skol, tin di bai “opvang” i despues tambe hasi trabou eskolar (hùiswèrk) pa entrega siguiente dia. Esaki ta trese un desbalanse na e skolnan pero tambe pa e alumno. Ademas Kòrsou mester pensa riba kua idioma di instrukshon mester implementá unda e alumno ta mas kómodo.
A keda konkluí tambe ku maneho di Edukashon i Métodonan apliká ta importante pa e faktor di desigualdat den Enseñansa. Na Kòrsou tin un diferensha entre dosentenan kon ta aserka nan alumnonan. Tambe tin diferensha entre e sistema di hasi prueba, dunamentu di lès, medionan i èrmèntnan disponibel. Por nota ku riba e fariabelnan menshoná, un grupo di alumno tin bentaha riba otro. Por not’é den e resultadonan abase di e sifranan ku ta desaroyá i sigui den e sistema sekundario tambe. Mester wak pa kuminsá tur kos riba un liña i krea oportunidat igual pa nos alumnonan,.
Segun dr. Kennedy Tielman, den komunidat bo ta tende hopi biaha e menshon “skol di bario”. Kisas ta bon pa kuminsá laga e definishon “ei” kai, esta “skol di bario”. Na su opinion skol di bario ta un etikèt impráktiko pa deskribí un skol òf sistema di enseñansa. Den e époka aki tin hopi moveshon i no ta nesesario mas pa keda ku e termilogia “skol di bario. E ta wòrdu uza pa splika ku muchanan den bario ta bai un determinadó skol. E ta duna un toke diferente, alegando ku e maestronan na e skolnan di bario ta diferente for di e skolnan “élite”.