Back to Top
Responsive image
E korant di pueblo

Mester bini ku medida pa wak pa e kontagionan no sigui subi i hinka nos den problema


March 15, 2021 • 2 minüt pa lesa

Willemstad,- Dòkter Izzy Gerstenbluth a splika ayera ku e situashon no ta bayendo bon i ku e sifranan ta indiká esaki.

Señor Gerstenbluth a splika ayera ku pa loke ta e sifranan di ayera, a hasi 390 tèst di kual 59 a sali positivo i 10 hende a sali for di isolashon, miéntras ku tin dos hende nobo a keda akseptá na hospital i unu ku tabata den hospital kaba a tèst positivo, pues tin ocho (8) persona ku Covid nan e momentunan aki den CMC i unu di nan ta den kuido intensivo. E kasonan aktivo a subi na 373.

Señor Gerstenbluth ta bisa ku si bo por logra saka hende for di isolashon, e kantidat di kasonan aktivo ta baha. Pues e temporada ku un ku dos hende tabata bira malu pues tèst positivo i mas hende ta sali for di isolashon, ta pone ku e kantidat aktivo tabata baha. E ta bisa ku último dianan mirando kuantu kaso positivo tin i kuantu ta sali for di isolashon, di mes e kantidat di kasonan aktivo ta keda subi. Esaki ta motibu tambe ku mester bini ku medidanan.

Dòkter Izzy ta bisa ku si bo ke yuda bo ekonomia, ta nifiká ku bo ta tumando riesgo, pues si e vírùs ta asina kontagioso, e ta bai plama i p’esei mester bini ku reglanan pa wak tòg pa esaki no sosodé.

E epidemiologo señor Gerstenbluth ta sigui bisa ku si tin hende ta bisa ku bo ta mata bo ekonomia, nan por wak paisnan manera Brazil, por wak e kantidat di hendenan ku ta bira malu, bai hospital i muri. “Esaki ta loke no ke pa nos pais”, pues dòkter Gerstenbluth. Pues esnan ku ta duda, e ta bisa ku tin prueba pa nan wak kiko ta sosodé ora bo no hasi nada.

E ta bisa ku e sifranan aktivo surpasá loke tabatin na yanüari. Pues mester wak pa nos no kai den problema grandi i p’esei mester tuma medida.

E ta bisa ku 40% di hendenan ku ta malu ku Covid awor aki ta entre 25 i 40 aña. E ta bisa ku den e grupo tin hendenan tambe ku ta den  grupo di riesgo.
“Si e “positivity rate” ta muchu haltu, ta nifiká ku nos mester tèst mas tantu, e porsentahe mester ta mas abou. E loke tin awor aki ta kaso 20%, kual ta muchu haltu. E “positivity rate”  mester ta bou di 5% kual ta kaminda nos tabata. E tabata hasta na 2% kual tabata hopi bon.

Si e rumbo aki sigui, nos ta yega 17%”, asina señor Gerstenbluth a splika.

E ta splika ku si mas hende den nos komunidat tuma e vakuna, nos por kita tur e medidanan i otro kosnan ku a bin ta hasiendo pa evitá ku e vírùs ta plama.

Login