Back to Top
Responsive image
E korant di pueblo

Mester probechá di e vakashon pa bakuná dosentenan


March 30, 2021 • 1 minüt pa lesa

Willemstad—Siman pasa sindikatonan di dosentenan a bati alarma pa ku risiko nan ku dosentenan ta kore pa ku e subida drástiko di kasonan positivo di COVID19 dor di laga skolnan habri sin ningun adaptashon pa ku e situashon aktual.

Riba e preokupashonnan di e dosentenan aki korektamente minister enkargá ku enseñansa sr Croes a tuma e desishon pa sera skolnan parsialmente ku eksepshon di esnan ku mester traha eksámen promé ku vakashon. Awor aki segun Parlamentario di Frakshon di MAN mr. Giselle Mc William mester usa e temporada di vakashon pa bakuná mas tantu dosente ku ta posibel pa asina despues di vakashon skolnan por habri den por ehèmpel ku e sistema di cohort, miéntras ta logra bakuna dosentenan mas lihé ku ta posibel. Ta sumamente importante pa krea e trankilidat bou di dosentenan, alumnonan i mayornan pa por kontinuá ku lèsnan na skol i asina evitá pa e alumnonan ta kai mas atras ku e kuríkulo di e aña eskolar aki. E responsabilidat ta den man di Minister enkargá ku salubridat publiko sra. Zita Hesus Leito pa huntu ku su tim di profeshonalnan pa bakuna mas tantu dosente posibel den e próksimo dianan aki.

Login