Prevenshon di sushi ta muchu mas efektivo ku resiklahe, pero esaki no ta nifiká ku énfasis riba resiklahe ta robes.

Barber, — Hòfi Pastor a organisá un evento edukativo den kual Green Phenix, un kompania di resiklahe, a bin duna un presentashon tokante di sushi.

Segun Tijmen de Vries di Green Phenix, e gol i meta final ta pa stòp di produsí tantu sushi. Ounke e piramit di maneho di shushi ta mustra ku prevenshon di sushi ta muchu mas efektivo ku resiklahe, no ta nifiká ku énfasis riba resiklahe ta robes. E asina yamá piramit di maneho di shushi, ta demonstrá presis kua opshon ta mas i ménos faborabel ora ta papiando pa deshasí di shushi.

Resiklahe di plèstik ta kontribuí na un ekonomia inklusivo sirkulario. Esaki ta un modelo ekonómiko den kual, entre otro, ta minimisá uzo di rekursonan natural pa traha produkto. I ta uza produktonan ku ya ta eksistí kaba manera por ehèmpel plèstik, pa traha produktonan nobo por medio di resiklahe.

Aktualmente tin diferente kompania ku ta kolektá diferente tipo di shushi i resiklá esakinan i tambe tin kompanianan ku ta eksportá sushi ku meta pa resiklahe. Tin diferente kaminda na Kòrsou ku tin bakinan di kolekshon pa resiklahe den kual por resiklá diferente tipo di sushi manera aluminio, plèstik i papel.