Skalo— Manera ta konosí, den nos edishonnan anterior a analisá e sifranan di elekshon i komportashon di votadó na 2021 pa trata na duna splikashon riba e resultadonan di elekshon 2025.

Analisá: Vigilante i Extra a hiba un dia di transmishon históriko analisando sifranan i diskushonnan diversifiká riba elekshon. Riba e foto, Lilo Sulvaran (Vigilante) huntu ku Urvin Pieter (Extra) den kombersashon ku direktora di KSE, Sheryl Losiabaar 5 or di marduga.

Ta opvio ku den region di Bandabou, Pik i MFK lo no tin problema. Den demas regionnan, MFK a simplemente krese na 2017, 2021 i awor oumentá na 2025. Laga nos ban wak e urnanan 17 te ku 52, kual ta e área mei mei di Kòrsou, rònt di Schottegat te na Gosieweg.  (Vigilante no ta uza e definishon di “distrikto). Ta trata di urnanan 17 te ku 52. Na 2021, un kantidat 34.775 hende tabatin derechi pa vota den e urnanan menshoná na 2021 (na 2025 e sifra a baha un tiki 33.644).

Kiko a pasa na 2021, ku a pone MFK gana mas voto na 2025, den e region. Na 2021, 24.604 votadó den e region a sali kas bai urna ku ta 70% di 34.775. Esei ta nifiká ku 30% di nan votadónan no a hasi uzo di nan derechi i ta e region mas haltu di no- votadó na Kòrsou.

2021
MFK na 2021, tabata e ganadó apsoluto, despues di a reta PAR for di 2017 na diferente urna. Pa kontadónan di voto na Kòrsou, e viktoria di MFK na 2021 no tabata un sorpresa.  Manera menshoná na 2021, MFK a sigui krese i sorpresivamente ta kita e viktoria for di PAR ku for di 2017 a bini ta tambaliá. Na 2017, Pik Pisas a perkurá pa dominá na Banda Abou i yegando na e urnanan mei mei di Kòrsou, Gerrit Schotte tambe a perkurá pa hala sufisiente voto pa gana di PAR den e di dos region. Tabata urnanan mas pariba, a pone PAR rekobrá tereno pa gana na 2017. Na 2021, MFK a gana den mayoria dje urnanan numerá 17 pa 52. Na 2025 nan a sigui oumentá.

Urna 17 te ku 52
Pero na 2021, e kosnan tabata diferente. MFK a simplemente dominá ku 4.484 voto den urnanan pabou di brùg pa despues kue 7.569 voto den e urnanan number 17 te ku 52 ku ta e área rondó di Willemstad i área besindario. Ta trata di e puntonan for di Jan Noorduynweg te na urna 52 na inisio di Gosieweg, St Bernardschool. E region ta kubri for barionan di Soaux i besindario, Sta. Maria i besindario, Buena Vista i besindario, Otrobanda i besindario i Suffisant i besindario. Ta trata di un kantidat di 36 urna.

MFK su dominio tabata opvio den kasi tur e urnanan mustrando un penetrashon di 30.7% di voto ku un promedio di 216 voto pa kada urna. 2021 a bira e di dos elekshon ku MFK ta gana PAR na Banda Abou i na regionnan mei mei, pareu. Pero aparte di a pèrdè kontra di MFK den urnanan 17 te ku 52, PAR ta baha kabes tambe pa Mimi i su tolda bèrdè. Partido Nashonal di Pueblo a perkurá pa un di dos sorpresa na 2021. Nan a pasa PAR i bira e di dos partido mas grandi den regionnan rondó di Willemstad ku 3023 voto i un promedio di 86 voto pa kada urna. Esaki tabata bon pa un penetrashon 12.2% di votadó. Si wak e urnanan su komportashon na 2025, por nota ku MFK a oumentá su penetrashon ku mas di 50%.

PAR a suak demasiado
Na 2021, PAR e triunfante di 2017, a drenta e di dos region kabes abou i pèrdí. For di despues di Jan Noorduynweg tabata bisto ku PAR ta bai pèrdè elekshon. E tolda hel a logra solamente 2.157 voto den e área lokual ta bon pa un penetrashon di 8.7% di e votadónan. Por averahe, PAR a logra 62 voto pa urna. Anke mester bisa ku tur aña ku e tolda hel a gana elekshon, nan prestashonnan no tabata bon den e regionnan mei mei di Kòrsou i no tabata sali fo’i Banda Abou komo esun di mas grandi. Na 2017 nan a bataya ku MAN i na 2021 ku MFK. Lokual a dal e flanènan hel duru, tabata e bentaha ku MFK a logra tambe den urnanan mas pariba 53 te ku 117 na 2021. Na 2025 e pèrdida di PAR a bira mas grandi miéntras MFK su bentaha a oumentá. PAR a pèrdè un asiento sigur entre Bandabou pa  region mei mei di Kòrsou.

Votadónan sin partido
Aparte di e kuater partidonan grandi, Trabou pa Kòrsou  i KEM tambe a presta bon pa mantené nan posishon pa yega 1 asiento na 2021, 2025 MFK a logra kombensé mayoria di nan votadónan. Na 2021, KEM a yega un total di 1.703 voto bon pa 7% penetrashon miéntras Trabou pa Kòrsou a yega 1.697 bon pa 6.8% di penetrashon den merkado di votadó pa e region. Den seno di e partidonan ku no a logra un asiento, nan votonan a bira interesante pa MFK.

Ta trata di e siguiente kantidat di votonan pa partidonan sin asiento: Kambio pa Kòrsou 1.189, Vishon 757, KDNT 1.198, MP 469, Partido Democraat 642, Kousa Promé 735, PIN 1051, Pueblo Soberano 393, KUMUN 489. Pa 2025, por lo ménos 6923persona a kambia di partido den e region i ta yuda MFK ku 1 asiento ku posibilidat di yuda den e  asiento reserva. Demas partidonan spekulá robes. Votadónan di PIN (1051), no bai pa MAN i esnan di Kambio pa Kòrsou (1198) no a bai pa KEM.KUMUN i Vishon tampoko no  por trese a mas voto pa PAR.  E tolda hel, ku a pèrdè  na 2021 despues di a gana na 2017, no rekuperá den urnanan mas pariba pa mantené su asientonan na 2025.

Ku 6.923 votadó sin un partido na 2025 i 10.432 persona ku no a bai vota na 2025, e region tabatin tin un potensial di 16.620 votadó ta drif wak. Mayoria a skohe pa MFK, lokual niun hende a premirá den forma asina abrumador