MFK no ta aproba e loke ku Parlamentario Carolina a deklará den Parlamento.

Willemstad—-Movementu Futuro Kòrsou (MFK), a tuma nota di e disertashon di Parlamentario Juniël Carolina kaminda su persona ta indiká pa bende droga konfiská na Kòrsou ku Hulanda.

E deklarashon aki a trese hopi konsternashon den komunidat di Kòrsou i MFK ta lamentá esaki profundamente. Un Parlamentario ta huramentá pa e vota i desertá konforme su konsenshi i sin “ruggespraak” loke MFK ta respetá, pero MFK ta desaprobá e deklarashon di Parlamentario Carolina i ta informá komunidat ku e deklarashon aki no ta den e liña di pensamentu di MFK. MFK na diferente okashon a deklará ku pa legalisá kualkier supstansia prohibí, ku esaki mester tuma lugá via di un referendum kaminda pueblo ta tuma e desishon i MFK su posishon relashoná ku esaki no a kambia. MFK ta para pa leinan den nos pais wòrdu respetá i MFK no ta tolerá pa di ningun forma ningun gobernante ni abitante di Kòrsou violá nos leinan i mas ora ta trata di supstansianan prohibí. Pa medio di esaki MFK kier pidi pueblo di Kòrsou diskulpa pa e deklarashon di nos miembro di Parlamento i pueblo por ta sigur ku MFK lo no tolerá di ningun forma violashon di nos leinan òf pa hasi negoshi ku supstansianan prohibí.  Gilmar Pisas Lider Polítiko di MFK.