MFK lo mester bai establesé henter un departamentu di “human resource” pa e kantidat di personal pa e trabounan pa 2025-2029.

Punda,– E karavana ku a duna sosten kompletu di MFK riba e dianan di elekshon, awor lo keda den un karavana di empleadonan nobo, tantu den gobièrnu komo den parlamento. Ku 55% di voto, kalkulashon nan ta konkluí ku MFK ta risibí 13 asiento den parlamento. Mirando tur indikashon ku MFK t’ei huramentá solamente su miembronan riba lista komo minister, tin tur indikashon ku MFK ta bai presentá un karavana kompletu den Punda.

Tur minister ta risibí e derechi pa bini ku un gabinete di 7 empleado. Komo ku MFK ta bai forma a koalishon riba su mes, esaki ta nifiká ku huntu ku su 9 ministernan, 72 persona ta bai drenta fòrti despues ku e ministernan tur keda nombrá serka gobernador. Mas aleu, parlamento lo konsistí di 13 parlamentario di MFK pues, ku 2 trahadó di e frakshon, 15 persona di MFK ta bai ehersé e ròlnan den parlamento. Inkluyendo e minister plenipotensiario i e minister plenipotensiario suplente, esaki ta nifiká ku MFK ta bai tin di buska alrededor di 89 persona pa traha tantu den e gabinete komo den parlamento.

E lista number di MFK ta konsistí di 29 miembro. Kaminda Gilmar Pisas ta liderá e lista, Dr Eduard Braam ta karga e lista ku puesto number 29. Esaki ta nifiká ku ainda MFK tin di buska 60 empleado pa reforsá MFK su maneho pa e próksimo 4 aña. MFK sigur lo bai kuminsá ámtenarnan tòp den  e ministerionan pa reforsá e gabinete. I despues lo bai buska personanan ku aktualmente ta trahando den sektor privá. Tin tur indikashon ku konforme lei, tur ámtenar ku djòin e gabinete lo risibí un oumento di 25% riba nan salario aktual. Esaki lo kore tur esten nan ta keda den servisio pa e gabinete. Alabes pa buska personanan kualifiká den sektor privá lo bini ku su difikultat mirando ku pagonan den sektor privá pa posishon nan haltu/studiá ta keda mas abou ku funshon similar den e aparato públiko.

Kon ku mir’é, esaki ta promé biaha den historia di pais Kòrsou ku un partido ta gana un elekshon ku un márgen grandi asina. E partido ku a yega mas serka den e elekshon aki ta PNP, ku 16% di e votonan.