Ketu bai tin reklamo den korte ku Warda Kosta ta interseptá boto den awanan di Venezuela.

Punda,– Neomal Cedeno kende ta wòrdu akusá di a transportá 1300 kilo di mariwana mas 3 kilo di kokaina ta sigui enfatisá ku Warda Kosta a interseptá nan boto den awa teritorial di Venezuela i no den awa internashonal.

E akusado tabata forma parti di un tripulante di 7 persona kaminda riba 24 di Yüni e fregata di warda kosta a nota e hòmbernan riba un lancha unda a interseptá nan nabegashon. Durante investigashon a bin resultá ku tabata trata di un nabegashon narkotráfiko, pero segun e venezolanonan nan no tabata den awanan internashonal sino ainda nabegando den laman venezolano, apénas 7 mia.

Durante tratamentunan anterior, e 7 hòmbernan tabata diskutí por gran parti ku Wardakosta a interseptá nan lancha den awa teritorial di Venezuela. Mas aleu, e kaso anterior a bai asina leu ku korte a ordená wardakosta pa presentá ku prueba di GPS mirando e diskushon nan di e abogadonan tabata demasiado sólido. E kaso a finalisá ku e tripulante di 7 persona a keda kondená na un kastigu inkondishonal di 5 aña.

Den e kaso di apelashon Neomal Cedeno a enfatisá ku e plan tabata pa move ku e lote di mariwana di Colombia pa Venezuela. Nunka e no tabata tin e intenshon pa hasi Kòrsou ni e reino Hulandes daño, pues e ta lamentá kon e ta será aktualmente na Kòrsou. Cedeno a indiká den su kaso penal ku nan lo a pag’é entre 3 mil pa 5 mil dòler, pero dado momentu nan boto a keda interseptá. Sinembargo, Neomal Cedeno a sigui splika ku e no tabata na altura kiko tur tabata tin den e boto. “Asta kuminda sa wòrdu importá riba forma ilegal for di Trinidad, pues den e kahanan abordo por tabata tin diferente kos”.

E deklarashon nan di Cedeno indikando ku nan a wòrdu interseptá den awanan teritorial ta riba mesun liña ku sigur 14 otro Venezolano ku a keda interseptá den otro kasonan penal. E akusashonnan ta andando for di Yüni 2023 pero atrobe ta lanta preguntanan si en bèrdat e akusashon di e narko-nan ta bálido. Den diferente kaso penal huesnan ta risibí deklarasho kaminda ta duda si e data di GPS di wardakosta ta legítimo. Tambe den práktika wardakosta tin un historia pa senk e lancha na e sitio di intersepshon, pues no tin ningun manera pa verifiká e GPS di wardakosta.

Korte di apelashon a indiká ku nan mester di tempu pa deliberá e kaso i lo duna nan veredikto riba 11 di yüli próksimo.