Reklamo: hopi kontratista ta reklamando ku no tin pèrmit pa duna trahadó ku kier traha. Cooper ta sakando pèrmit di konstrukshon pero ta dependé di otro ministerio pa krea kupo legal den konstrukshon.

Seru Ararat—Último tempu minister di planifikashon urbano, Charles Cooper ta risibiendo bastante elogio despues di ta sakando diferente pèrmit pa konstrukshon. Pero miéntras e minister ta sakando pèrmit aki banda, skarsedat di trahadó i pèrmit di empleo ta pegando konstrukshon na Kòrsou.

Esaki ta lokual dos kontratista grandi na Kòrsou a deklará na Vigilante kual deklarashonnan a keda konfirmá na VVRP, ku nan tambe lo ta risibiendo mesun. Siman pasa e departamentu di VVRPO a saka dos pèrmit grandi. Minister Charles Cooper huntu ku Servisio pa Planifikashon Urbano (ROP) a entregá un pèrmit di konstrukshon na ‘Nijmegen Resort’ i ‘Vredenberg Resort’, pa konstrukshon total di 51 bibienda.  ‘Nijmegen Resort’ ta situá na Nijmegenstraat den e bario di Vredenberg/Marie Pampoen. Lo bai konstruí 29 bibienda, dividí den dos edifisio. E resort aki ta un kombinashon di apartamento i kas. E desaroyo ta konta ku un invershon total di 22.3 mion florin.  ‘Vredenberg Resort’ ta situá entre e bario di Vredenberg i Marie Pampoen, i aki lo bai konstruí 22 apartamento, dividí den dos edifisio. Durante di ehekushon di e proyekto di konstrukshon aki, lo tene debido kuenta ku desague di awa na Vredenberg, i lo sòru pa sufisiente lugá di parkeo pa e apartamentonan. E desaroyo aki ta konta ku un invershon di 16.5 mion florin.

Un otro aspekto pa konsidera tambe ta e área di Rif. Segun  Cooper ku sigur den e próksimo añanan benidero lo bai desaroyá e aria di RIF na unda lo bai konstruí un kantidat di bibienda pa asina hasi e aria unu bibu. Cooper splikando di e desaroyo ku ta bai tin  den Otrobanda prinsipalmente e aria di Rif a trese padilanti ku di awor pa e próksimo 12 aña lo bai tin basta kambio. Ya tur hende ta na altura ku e stadion di Rif sigur lo no bai keda na e mesun sitio mas. Es mas e edifisio di SVB i tambe ACU tambe den futuro lo bai disparsé. Sigur nan lo wòrdu ubika na un otro sitio. E edifisio di SVB hopi chèns lo wòrdu ubika den Otrobanda mes den aria di Colon ya asina e ta poko mas serka di Hospital. Tur esakinan ya ta plania Minister Cooper a sigui splika. Pa ku e tereno unda SVB, ACU i tambe Stadion di Rif ta ubika esaki lo bira un aria bibabel. Esaki kier men ku lo bai konstruí mas ku 1700 bibienda pa asina por hasi nos sentro di suidat mas bibu.

Un otro proyekto resien ta e proyekto di Hòfi Vidanova. Fondo di penshun Vidanova tambe a risibí su pèrmit pa konstrukshon di bibienda den un plan di parselashon. E plan ta konsistí di 2 fase. E promé fase lo ta pa 150 bibienda. Esaki huntu ku e infrastruktura ta representá un invershon total durante e promé fase di alrededor di 95 mion florin. E konstrukshonnan aki ta kontribuí outomátikamente na un impulso ekonómiko grandi pa Kòrsou i tambe ta aportá na e nesesidat pa mas bibienda. E ta duna un impulso na ekonomia tambe dor di kreashon di kupo di trabou na momento di e konstrukshon i durante di e fase di mantenshon. Minister Charles Cooper ta hopi satisfecho ku e desaroyonan aki, ya ku e ta ofresé nos pais un “boost” ekonómiko.

Pero pa por konstruí mester di trahadó i Kòrsou na e momentonan aki tin un skarsedat grandi di trahando den konstrukshon. Tantu na nivel si spesialista komo na nivel di peon, tin skarsedat. Diferente kompania di konstrukshon ta tratando na kontratá stranheronan riba e isla, sin un pèrmit pero e proseso ta pegá na Servisio di SOAW.