Back to Top
Vigilante banner image

Silensio: hopi pregunta sin kontesta relashoná ku selekshon nashonal di futbòl


June 29, 2021 • 3 minüt pa lesa

Tin un silensio hermetiko rondó di nos selekshon, ku ta sòru pa basta prekupashon serka fanatikonan. D.r.p.d. Manager di nos selekshon, presidente di FFK i hefe di delegashon di nos selekshon.

WILLEMSTAD—Miéntras ku mañan djarason dia 30 yüni 2021, ta fecha pa e promé grupo di e delegashon di nos selekshon nashonal sali pa Merka pa Kopa di Oro 2021, ainda tin masha hopi pregunta sin kontesta i klaridat.

Lista di hungadónan

Despues ku tabatin un lista ku e mihó futbolistanan oriundo di nos isla, komo hungadónan preselekshoná, finalmente ainda no a hasi publikashon di esnan ku definitivamente a keda konvoká pa ta na Merka otro luna.

Un ke otro despues ku tabatin diferente di e futbolistanan, unda algun no a bin den prensa, pero tambe tabata rabiá ku nan nòmber tabata parti di esnan preselekshoná, sin ku a komuniká ku nan. Esaki meskos ku e kaso di entre otro Riechedly Bazoer i Joshua Brenet, kende nan si a laga prensa sa di e aktuashon i komportashon di nos dirigentenan,  konsiderá entre otro un atrako, segun Bazoer i tiramentu di pará, segun Brenet.

Gevaro ta bèk ?

Rumornan insistente ta indiká ku e ábil futbolista, Gevaro Nepomuceno lo por ta bèk ku nos selekshon nashonal pa Kopa di Oro, otro luna. Esaki despues ku resientemente e no a wòrdu konvoká, unda ku e motibu pa esaki tampoko no tabata bon konosí. Ta trata di futbolista ku finalmente a hasi falta riba tereno, durante di nos último kompromisonan.

Embahadó ta bolbe bira hungadó ?

Mas aleu tambe tin indikashon ku nos embahador, lo por ta bèk riba e lista di hungadónan konvoká. Ta trata aki di Shanon ‘Cheese’ Carmelia, ku dirigentenan, aparentemente lo a skohe pa su retiro ofisial, por ta den Kopa di Oro 2021.

Nos kipernan

Otro interogativo, ta e diferente kipernan ku nos lo tin próksimamente. Despues ku semper a biaha ku 3 kiper, aparentemente tin preshon pa e biaha aki, biaha ku 4 kiper. Eloy Room, kende ta nos kiper estelar, sin duda lo enkabesá e lista, siguí pa Zeus de la Paz, ku lo ta e di 2 kiper di nos selekshon.

Miéntras ku awor por a mira ku Tyrick Bodak durante di un entrevista siman pasá, den prensa na Hulanda, a deklará di lo bai ta na Gold Cup ku Kòrsou. Ta trata aki di hóben di 19 aña di edat i sigur esun ku lo mester bira e titular próksimamente, unda lo e tin hopi aña pa bai. Esaki unda ku ainda no a hasi menshon di Jean-Marc Antersijn, ku a wòrdu buská for di Aruba i kisas pa no ta un desepshon pa su persona, lo bai komplasé i biaha pa promé biaha ku 4 kiper.

Ken ta nos tékniko ?

Tur esakinan, sin ku ainda tambe no a ni hasi menshon, ken lo bai ta e tékniko pa dirigí nos ekipo nashonal na Merka. Guus Hiddink ta kompletamente rekuperá i lo ta di regreso ?

Patrick Kluivert ainda ta komo su remplasante ?

Lo tin un asistente nobo, despues ku Alex de Crook a baha bai i a skonde motibu ku e la bai ?

Esaki sigur si tene kuenta na reakshon i komentarionan fuerte di esun enkargá ku téknikonan pa nos federashon, durante di nos último weganan na stadion. Un ke otro unda ku e no tabata nada kontentu i si basta furioso, ku e diferente asistentenan ku si tabata presente, indikando ku no tabata bisa Kluivert nada.

Òf lo bai ta un kombinashon di Hiddink i Kluivert, unda sigur na tékniko so, nos lo tin bastante gastu, ora momentu di pago yega. Importante pa sa, kiko lo bai ta e desishon final, unda Deporte Vigilante a risibí asta pregunta, sin por a duna e kontesta, ta ken berdaderamente a wòrdu pagá komo tékniko, durante di e último weganan.

“Nos a paga un hende malu ku a keda kas tambe ? Òf ta loke nos ta pag’é, e ta paga Kluivert for di dje ?”, e fiel fanátiko di futbòl i di nos selekshon nashonal a puntra.

Prekupashon

Ku nos selekshon nashonal na pechu, Deporte Vigilante a kompartí djis algun di e prekupashonnan i dolónan, ku fanatikonan tin i ta komuniká pa ta na altura diariamente. Esaki meskos ku bo sirbidó mes tambe, apesar di ta sinti ku den seno di nos dirigentenan mes, ainda no tin nada konkreto, debí ku tampoko ta na altura ken ta tuma desishonnan final riba nos ekipo nashonal, konsiderá awor un grupito di ‘Nos ku Nos’. Apesar di tur esaki, Deporte Vigilante ku semper ta biba ku nos ekipo nashonal, ta deseá nos selekshon nashonal, tur klase di éksito den ‘Gold Cup 2021’.

Login