Minister Cijntje ta bisa ku lo enkaminá trayekto pa introdusí spesifikashon adaptá di kombustibel na Kòrsou.

Willemstad,– Ayera tardi tabatin un rueda di prensa kaminda ku minister Ruisandro Cijntje a anunsiá e resultado di investigashon riba kalidat di kombustibel.

Minister a kuminsá ku anunsiá ku e lo bai papia riba diferente punto.

Minister Cijntje ta splika ku base di Kòrsou su kombustibel ta reglá den e “Richtlijnen 2011”ku ta regulá kalidat di kombustibel i ku Curoil ta mantené su mes na e “richtlijnen” pa por garantisá konsistensha di e kalidat di kombustibel.

E ta splika ku tambe tin e spesifikashon di e kantidat mínimo i esun máksimo. Por ehèmpel komponente suafel Diesel: 500 ml/kg i gasolin: 1000 mg/kg.

Minister Cijntje ta sigui bisa ku e lokual a bai promé ta e relashon entre preis i kalidat. Na sèptèmber 2020 tabatin akshon di shofùrnan di taksi, bus i ekiponan pisá.

Yüni 2022 minister di Desaroyo Ekonómiko, Ruisandro Cijntje a aktivá e grupo di trabou i a entamá un destaho públiko.

E ta sigui bisa ku na sèptèmber 2022 grupo SGS Inspire  (un kompania Aleman ku eksperensia, konosementu i kapasidat amplio den e merkado internashonal di kombustibel a kuminsá yuda i na novèmber 2022 SGS Inspire tabata di bishita na Kòrsou. E ta sigui splika ku inisialmente e estudio lo a dura tres luna, pero despues esaki a tuma un tiki mas pa wòrdu validá ets dor di stakeholders.

E konklushon ku por a saka pa loke ta e kalidat di kombustibel den e último 5 añanan ta ku e kontaminashon menshoná por a tuma lugá den e kadena di almasenahe i/òf distribushon. Tambe e kombustibel distruí ku ta konforme e ‘richtlijenen’ vigente no ta kompatibel ku teknologia di vehíkulonan mas nobo i nan ta nan ta mas apropiá pa e vehíkulonan produsí promé ku aña 2000.

Tambe den e rapòrt tabata rekomendashonnan kaminda minister ta bisa ku esnan mas prinsipal ta pa adaptá Kòrsou su spesifikashonnan di tantu gasolin komo diesel ku ta usando aktualmente. E ta bisa ku aki nan ta menshoná 10 parameter ku mester keda adaptá manera entre otro suafel, silikona , chloor orgániko i awa.

Tambe lo mester eksplorá introdukshon di un kantidat limitá di gasolin i diesel nobo (di kalidat haltu) huntu ku e kalidat ku ta keda ofresé aktualmente riba merkado lokal.

Un otro rekomendashon ta pa instituí un programa pa monitoria e kalidat di kombustibel den hinter e kadena di distribushon.

Por último minister Cijntje ta bisa seguidamente ku lo enkaminá trayekto pa introdusí spesifikashon adaptá di kombustibel na Kòrsou. Tambe SGS Inspire ta duna un periodo di transishon di máksimo dos (2) aña di tempu i e último ta un estudio riba impakto di rekomendashonnan riba preis di produkto.