Minister Cijntje tambe tabata na Argentina pa e wega di Kòrsou i a primintí di sigui hasi kos pa promové turismo di nos pais.

Willemstad,– Minister di Ekonomia señor Ruisandro Cijntje a pone riba su página di facebook ayera ku e ta sumamente orguyoso i kontentu ku e kobertura ku Kòrsou a risibí durante di e wega amistoso entre Kòrsou i Argentina ku ta e kampionnan di mundu.

E ta bisa ku Kòrsou su nòmber a keda menshoná den e grandinan di mundu i sigur pa tur esnan ku tabata den e stadion. “Nos por a tuma nota ku e stadion “Unico Madre de Ciudades” tabata bastante yen, i esei ta mi satisfakshon”, asina e titular di Ekonomia a duna di konosé.

E ta splika ku ketu bai lo e keda hasi su esfuersonan pa por promové turismo di Kòrsou pa medio di deporte. “Mi esfuersonan lo no kaba i lo mi hasi tur kos ku ta na mi alkanse, pa mi purba saka mas benefisio posibel for di e enkuentro ku a tuma lugá djamars último kontra di Argentina na Argentina”, asina e minister a tèrminá bisando.