Minister Charles Cooper huntu ku Servisio pa Planifikashon Urbano (ROP) a hasi entrega di pèrmit di konstrukshon na Residenza ARIA

Willemstad,– Den un akto ofisial ayera mainta na ROP Minister Charles Cooper huntu ku Servisio pa Planifikashon Urbano (ROP) a hasi entrega di pèrmit di konstrukshon na Residenza ARIA, pa konstrukshon di un kompleho di apartamentu masha luhoso. Esaki lo ta un invershon total di 13 mion florin i konstrukshon ta kuminsá na yanüari 2023.

Residenza ARIA ta ubiká na Lyraweg den área di Girouette. Esaki segun nos EOP ta stipulá,  ta un área destiná pa bibienda. Lo konstruí pronto 19 apartamentu luhoso. Lo traha e apartamentu nan aki ku material di kalidat haltu ku lo ta ubiká na un sitio bunita i masha gustá di Kòrsou. E apartamentu nan aki lo tin un bista masha bunita di e área di e pisina i e paisahe kreá, mirando ku e ta situá na un parti mas haltu i lo por mira nos isla tambe. E grandura di e apartamentu nan aki ta varia entre 2 te ku 4 kamber, i lo tin 3 ‘penthouse’ grandi i impreshonante. Bohorquez Architecten a bin ku e diseño úniko i moderno aki.

E desaroyo aki ta aportá na halsa e kalidat di bibienda den e área. Konstrukshon ta kontribuí outomátikamente na impulso ekonómiko pa Kòrsou, i e ta duna un impulso na ekonomia dor di kupo di trabou na momento di e konstrukshon, mantenshon i desaroyo.

Minister Charles Cooper ta hopi kontentu ku e proyekto aki i ku ta diversifiká e área di Girouette i ta ofresé mas opshon di bibienda.

El a bisa ku ta hopi esfuerso a ser hasi pa por e logra esaki i tambe el a elogiá e bon trabou d ROP pa por a saka e pèrmit di konstrukshon.

Cooper a primintí ku pa otro siman mes lo bai tin dos pa tres permití di konstrukshon mas ku lo keda entregá i ku e lo sigui pone komunidat na altura di e kosnan ku ta pasando. Cooper ta bisa ku ta hopi kos bon tin ta pasa den komunidat ku no ta haña publikashon i ku pa e motibu  ei e si lo sigui pone su komunidat na altura di lokual ta pasa den su ministerio.

E titular di VVRP a bisa ku tipo di proyektonan asina ta habri kupo di trabou pa yu di Kòrsou i ku gabinete Pisas a bisa ku nan ta bai pone ekonomia riba  pia i esei ta lokual ku ta pasando.