Willemstad—–Djamars último Promé Minister demishonario Eugene Rhuggenaath a reuní virtualmente ku  Sra Jolita Butkeviciene Direktora di e departamento  Latin America & Caribbean di Union Oropeo. Durante di e reunion  promé Minister demishonario Eugene Rhuggenaath a firma un akuerdo pa un montante di 16.95 Mion Euro via di“Europees Ontwikkelingsfonds” (EOF). E kolaborashon aki ta posibel dor ku Kòrsou ta formá parti di e paisnan pafó di Oropa (LGO) ku tin relashon ku miembronan di Union Oropeo. Paisnan ku ta den LGO por hasi un petishon riba e fondonan. E akuerdo ta un kolaborashon ku ta konsistí  di un parti territorial, regional i ta toka un tema spesífiko.

E tema prinsipal di EOF 11th ta;

 “Building Resilient and Sustainable Communities”
“Konstruyendo un komunidat resilente i duradero”.

Den e tema aki ta bai ehekutá varios projekto na bienestar di komunidat huntu ku diferente entidatnan lokal.

Kòrsou tin dos meta prinsipal.

1. Mehorá  e resiliensa di infrastruktura (publiko) i mitigá e riesgonan asosiá ku kambio den klima.
2. Duna sosten na e resiliensa ku tin den komunidat, mas partikular den bario vulnerabel .

Pa logra e metanan menshona lo:

• (re)Konstruí infrastruktura den diferente bario i areanan públiko ku kambio de klima den mente i asina pone e prome stapnan den un futuro sostenibel i duradero. Por ehèmpel drecha trottoir, iluminashon pa kayanan i lugarnan publiko, konstruí parke pa promové rekreashon i moveshon pafo den aire liber i tambe kontribuí na koheshon sosial.
• Konstruí un sistema di irigashon di awa mas sofistiká na mehorashon di nos medio ambiente, desaroyo ekonómiko i sostenibilitat. Esaki por wòrdu usa pa e parti di agrikultura ku tambe ta wòrdu desaroya. E parti aki ta sostené nos medio ambiente, krea trabou i kultivá konosementu lokal.
• Krea un komunidat di hende kapasitá i resiliente ku ta akapará ku konosementu pa mira solushon i oportunidat pa desaroyo en partikular den bario’s vulnerabel. Esaki lo sosode den forma di training of kurso, pero tambe den vèlt den un programa di stazje. Asina nos hendenan ta desaroya nan kapasidat i oumentá nan resiliensa kontra faktor no premirá manera un pandemia.
• Mehora i reforsá e “partnership” entre Gobiernu, sektor privá i diferente gruponan di interes (NGO) ku ta represtenta tur grupo i persona den komunidat.

E projektonan lo wòrdu ekhuta den e barionan Sapaté, Fortuna Ariba Fase 2, Otrobanda i Tera Cora. Nos ta sumamente orguyoso ku nos pais a risibí e fondonan aki pa asina por sigui traha na bienestar di Kòrsou.

Extra note: Kòrsou a risibí den 2018 tambe fondo di Union Oropeo. Ku esaki a ehekutá  projektonan na e bario’s Kortijn, Tera Cora, Nieuw- Nederland i Sapaté.