Punda—Segun minister di Finansas Públiko, Javier Silvania, Kòrsou mester di Hulanda pa sosten finansiero. Esaki ta lokual e la duna di konosé ayera durante su ronda di kontesta na Parlamento di Kòrsou. Silvania a bolbe ripití lokual e la duna di konosé na su promé rueda di prensa. Pa desèmber Kòrsou ta den un pèrtá di 509 mion florin, mei bion florin.

Segun Silvania, na momento e la drenta Fòrti, tabatin 80 mion florin den kaha di gobièrnu i durante Mei, Ontvanger a kobra 80 mion florin na impuesto. Esaki a pone ku tabatin un suma di 160 mion florin na likides, pero e gastunan mensual di gobièrnu ta kasi 170 mion florin mensual. Konsekuemente Yüni ta sera na un défisit di 10 mion florin i ta sigui krese na Desèmber pa yega 509 mion florin. Segun e titular di finansas públiko: “nos mester di sosten finansiero di Hulanda”.

Sin sosten finansiero di Hulanda, Kòrsou no por kubri su gastunan, e la sigui enfatisá ayera anochi durante e reunion públiko. Na e momentunan aki tin grupo di hende tei bira víktima. Entre otro esnan kende mester risibi restitushon riba nan impuestonan pagá riba entrada. Ta trata di e grupo di siudadano kende tin derechi di haña sèn bek serka gobièrnu. Segun Silvania, na e momentunan aki gobièrnu no tin e fondonan pa paga restitushon.

Otro problema, ta kompanianan pendiente pa risibi sèn konforme Areglo di NOW. MEO (Servisio Ekonomia) a hasi un petishon na Minister di Finansas pa por habri registrashon di NOW. Esaki ta regarda luna di Yüni. Manera a keda publiká den Vigilante, e minister a konfirmá ayera ku no tabatin e fondonan disponibel i tabata mihó keda sin habri e konekshon digital pa kompanianan por apliká. Mas serio ta e situashon ku kompanianan na remarke pa risibi fondo di NOW pa Mei, tambe ta wantá. Segun Silvania, tin un kalkulashon di 9 mion florin riba presupuesto pa paga na NOW. E fondonan ei, simplemente no tei el a agregá ayera durante su ronda di kontesta. Sin NOW, tin hopi kompania no tin entrada pa paga nan salario i konsekuentemente segun Silvania esei ta lokual tei sosodé tambe.

Silvania ayera a urgi pa Parlamento di Kòrsou wak e interes general. Tin un grupo di hende na Kòrsou na e momentonan aki “no tin pariba ni pabou”, el a añadí. Kòrsou mester di sosten finansiero di Hulanda anto Hulanda a pone kondishon pa pasa e dos leinan ku ya menshoná den medionan di komunikashon. Baha salario di minister i parlamentarionan i ademas despues esnan di direktornan di kompanianan anónimo i fundashonan supsidiá. Mas aleu, Hulanda ke pa Parlamento di Kòrsou ratifiká e akuerdonan hasí na Novèmber 2020.

Ku ratifikashon e minister a bisa di bai ehekutá e medidanan imponé pa Hulanda. E asina yama “Pakete di Pais”. Esaki no ta nifiká ku Parlamento mester ratifiká COHO, pasobra COHO no ta kla ainda pasobra na e momentonan aki , nan tim di ekspertonan ta sinta na mesa ámtenarnan na Hulanda di Asuntunan Interno. Esaki ta pa negoshá COHO.