WILLEMSTAD—-Djabièrnè 14 di yüni Minister di Hustisia, Shalten Hato, a hasi un bishita na Warda Kosta Region Karibe Hulandes i Militarnan na Kòrsou.  E bishita aki tabata dirigí pa por optené un bista mas profundo den operashonnan i retonan ku kua ámbos organisashon diariamente ta keda konfrontá.

E Minister a risibí un bon biní na Base di Marina na Parera di Komandante di Forsanan Naval  den Region Karibe  i alabes di Direktor di Warda Kosta,  Walter Hansen, i di Direktor Suplente di Warda Kosta, Joëlle de Jong-Mercelina.

E dia a kuminsá ku un programa ekstenso na Warda Kosta. E meta di e bishita tabata pa duna Minister Hato un bista di e tareanan diario di Warda Kosta,  entre kua, kombatí aktividatnan ilegal riba laman,  (tal manera kontrabanda di droga i transporte ilegal di persona), operashonnan di búskeda i emergensia, i salbaguardiá nos ambiente marítimo. Na e momentunan aki Warda Kosta ta tratando un proyekto di transishon, ku aña benidero lo sòru pa mas o ménos 40 kupo nobo di trabou.

Minister tambe a haña e oportunidat pa partisipá na diferente aktividat di deporte ku Personal di Warda Kosta, pa eksperensiá e importansha di kondishon optimal físiko pa e trabou aki. Minister a ekspresá su apresio pa e dedikashon i profeshonalismo di e personal di Warda Kosta i a enfatisá e importansha di nan labor pa seguridat nashonal. 

Tra’i mèrdia Minister a move den helikòpter di Warda Kosta pa bai riba e tereno di ehersisio militar na Wakawa. Aki Komandante di Militarnan di Kòrsou a risibié, den persona di Kapitan  Sicni Meulens. E programa tabata enserá un presentashon di e programanan militar i di entrenamentu  aktual, ku ta enfoká riba garantia di seguridat i stabilidat den region.

Minister a asistí na un práktika militar i a haña e oportunidat pa papia ku e militarnan tokante nan eksperensia i retonan ku nan ta konfrontá den nan trabou.  Minister a enfatisá den su spich e importansia di  koperashon entre e diferente servisionan di seguridat. Tambe el a ekspresá su apresio pa Militarnan di Kòrsou i a suprayá e importansha di un mayor profeshonalisashon di militarnan di Kòrsou.