Ruthmilda ta bisa ku tempu a bira moderno, hóbennan ta preferá di traha ménos ora pues tin desaroyo i nos mester biba ku e realidat nan aki.

Willemstad,– Minister di SOAW, señor Ruthmilda Larmonie Cecilia ta bisa ku e ta dispuesto na sinta pa papia riba kualkier maneho di flankeo ku mester bini. E ta bisa pa no bin bisa ku e mester traha riba dje solamente na momentu ku tin petishon pa oumento di e sueldo mínimo.

“Mi a indiká kaba ku mi no tin problema pa traha riba e maneho di flankeo, basta e ta na bienestar di esnan ku tin mester di dje”, asina e minister di SOAW a indiká.  E ta bisa ku e ta habri pa manera aña habri nan sinta na mesa pa diskutí riba e maneho. “Mi ta haña lamentabel ku nos ta diskutí riba sierto nivelnan enbes di traha na bienestar di pueblo di Kòrsou” pues Ruthmilda Larmonie Cecilia. E ta bisa ku gobièrnu su ròl ta pa wak tur hende, for di esun mas ariba te na esun mas abou i pues no por deskriminá di niun manera.

E ta bisa tambe ku si wak pantayanan rondó di oumento di sueldo mínimo, bo ta mira ku ta hopi diskushon ta lanta, siendo ta e trahadó ta esun ku ta traha pa tene bo kompania na laira. E ta bisa ku tin hopi abusu laboral ta tumando lugá ketu bai i e ta pidi pa ban para esaki, ban yuda duna informashonnan masal pa evitá e kantidat di abusu laboral ku ta tuma lugá. Tambe Mimi ta bisa ku e trahadó di su parti tambe mester kumpli ku su trabou pa asina e kompania krese na interes di tantu doño komo trahadó.

Segun e mandatario Kòrsou no ta bai skapa di fleksibilisashon. E ta bisa ku mundu a bira moderno, manera di traha a kambia i nos mester konsientisá nos hendenan. E diskushonnan aki ta hibando kaba i pues  nos no ta bai skapa di dje, paso ta algu mundial.  Ruthmilda ta bisa ku tempu a bira moderno, hóbennan ta preferá di traha ménos ora pues tin desaroyo i nos mester biba ku e realidat nan aki.

E ta splika ku por ehèmpel mester bai den direkshon di ménos ora pa siman i tòg haña mihó resultado, manera ya ta e kaso kaba na Boneiru. Pa loke ta Lei di retiru e minister a bisa ku doñonan ta bisa ku esaki ta stroba negoshi, paso no por kita trahadó fásil, mester tene kuenta ku konteksto di e pais. Mester tene kuenta ku akinan ainda ta paga atenshon hopi na CV di un hende sigur ora mira ku el a kambia hopi di trabou. “Ma indiká ku e lo no bai manera hopi ta deseá, pues ku bo por Hire and Fire manera bo ke. E ta bisa ku te ainda mayoria petishon pa retiro di trahadó ta bai konforme di lei.