Minister di SOAW señora Ruthmilda Larmonie Cecilia ta splika ku e maneho ta ku ora keda aserká pa yudansa ku pago dia awa, tur famia ku tin muchanan menor di edat ta haña prioridat.

Willemstad,– Minister di SOAW señora Ruthmilda Larmonie Cecilia tambe a kontesta preguntanan di parlamentarionan kaminda el a splika ku tin hopi hende na Kòrsou ku ta kere ku ta gobièrnu mester paga awa pa nan, pero esaki no ta asina, paso Aqualectra ta un kompania anónimo di gobièrnu.

E ta splika ku SOAW ta enkargá ku e parti sosial pa e famianan di ménos rekurso, esei ta nifiká ku un persona sin entrada te ku esun ku un sueldo mínimo, konkretamente ta supsidiá e famianan aki ku un parti di awa i koriente. E ta bisa ku ta tur dia ta topa ku famia ku no tin akseso na awa ku tur e konsekuensia ku esaki por tin. E minister ta bisa ku el a enkargá su ministerio ku un proyekto pa duna oportunidat na e personanan aki pa nan por registrá pa asina por atendé ku e nesesidat básiko. Mas aleu minister ta agregá ku tin otronan tambe ku ta aserka su ministerio ku nan no tin  awa, paso e debe a subi i Aqualectra a kita e awa i nan no tin  moda pa paga pa asina nan por drenta areglo di pago. Ministerio a kuminsá ku un proyekto ku ta yuda e personanan aki, pero e minister ta bisa ku e kos ta saliendo for di man. E ta splika ku ta trata di debenan di 20.000,  30.000, 50.00 i te hasta 148 mil florin. Segun señora Larmonie e but ku e hendenan aki ta haña ora trata di pone e awa bek, ta hunga un ròl den e parti aki. Ministerio di SOAW a pidi Aqualectra pa alertá e ministerio ora ku nan nota ku un kliente di SOAW no ta pagando su debe i ku e debe ta akumulá, pero e ta splika ku e parti aki ainda no a kristalisá. Ta nota tambe ku e klientenan ku paga nan debe pa nan, nan ta bolbe bai den e mesun patronchi i p’esei tin kurso awor pa e klientenan aki partisipá na dje, pa asina na  sa kon pa atendé esaki. Pero minister ta splika den parlamento ku tin klientenan ku no ta partisipá, paso nan ta bisa ku ta gobièrnu mester paga nan awa pa nan.

Minister ta splika ku e maneho ta ku ora keda aserka pa yudansa ku pago dia awa, tur famia ku tin muchanan menor di edat ta haña prioridat. Tambe e ta splika ku ta hasi un investigashon di e situashon pa tuma e medidanan nesesario huntu ku Aqualctra pa asina trese un solushon. Despues di kasnan ku tin menor di edat, e siguiente ku tin prioridat ta kasnan di grandinan.