Minister a primintí públikamente di lo bai buska e informashon na Banko di Seguro Sosial SVB, pa informá komunidat.

WILLEMSTAD – Parlamentario David Seferina a pidi atenshon di Minister di Salubridat Públiko, Medio Ambiente i Naturalesa Javier Silvania pa e situashon di personanan ku desabilidat físiko i ku no ta disponé di un transporte pa yega un spesialista.

E Minister a primintí públikamente di lo bai buska e informashon na Banko di Seguro Sosial SVB, pa informá komunidat.

Segun Seferina, pa basta tempu kaba tin siudadanonan ku desabilidat físiko ta aserk’é ku e problema di transporte, debí ku SVB lo mester kambia su maneho pa ku transporte riba e tereno akí i e personanan no ta na altura di esaki. “Esaki a trese basta frustrashon bou di personanan ku desabilidat. E frustrashon akí ta bin debí ku gran mayoria di e personanan ku desabilidat físiko ta kobradó di ònderstant òf no tin e entrada nesesario pa paga e tarifanan di transporte akí.”

E Parlamentario pa frakshon di MFK a tuma nota di e sifranan di senso datá na aña 2011, kaminda ta bisa ku tin un total di 24.302 persona ku desabilidat físiko, di kua 9.684 ta di e sekso maskulino i 14.618 ta femenino. “Esaki ta hasi ku gobièrnu mester pone mas atenshon na personanan ku desabilidat, paso tin Tratado di Nashonnan Uní, manera artíkulo 20 insiso a, ku ta bisa: ‘Facilitating the personal mobility of persons with disabilities in the manner and at the time of their choice, and at affordable cost’. Minister awó mas ku nunka mester atendé e situashon akí, pasó tur dia di nobo nos siudadanonan ku desabilidat físiko mester lucha kontra tur e bareranan manera transporte.”

P’esei Seferina a hasi diferente pregunta na Silvania relashoná ku e situashon akí: “Minister por splika Parlamento si ta bèrdat SVB a kambia maneho pa ku transporte? Si ta sí, Parlamento por risibí esaki? Ki maneho Minister lo bai hiba pa u transporte di SVB?” Riba tereno di e Ministerio di Desaroyo Sosial, Labor i Bienestart (SOAW) tambe el a puntra entre otro si Minister Silvania ta na altura di e situashon di transporte sosial, si e por splika Parlamento kuantu kobradó di ònderstant ku desabilidat tin ku sòru pa transporte sosial. “Minister ta na altura ku e sèn di kobradó di ònderstant no ta yega pa paga transporte sosial? Minister por splika Parlamento ku gobièrnu mes no por kumpra e bùs pa aliviá e personanan ku nesesidat sosial ku mester di transporte? I por último e ke sa di Silvania si e tin alternativa pa solushoná e situashon akí.  El a rekordá e Minister ademas ku segun regla e mester risibí un kontesta denter di dos luna.