Back to Top
Responsive image
E korant di pueblo

Minister Croes trahando riba un koperashon duradero entre Kòrsou i ROC Mondriaan


February 27, 2021 • 2 minüt pa lesa

Willemstad,- Regionaal Opleidingen Centrum (ROC) Mondriaan den siman di 15 te ku 19 di febrüari 2021 a hasi un bishita na Kòrsou pa un ‘fact finding mission’ pa yega na un koperashon duradero ku skolnan di SBO aki.

ROC Mondriaan ta un skol internashonal riba nivel di SBO (MBO) a bishitá Kòrsou siman pasa explorá e posibilidat pa establesé na Kòrsou atrabes di un koperashon estrecho ku skolnan SBO i otro ‘stakeholders’ den e sektor di horeca i turismo. E bishita aki tabata organisá huntu ku Kas di Kòrsou i komo tal e minister Plenipotensiario, sr. Begina, tambe a forma parti di e delegashon.

Durante e bishita na Kòrsou, e delegashon di e skol a sinta ku diferente funshonanio di ministerio ESKD pa konosé nos sistema edukashonal i tende di e retonan ku e sektor di horeca i turismo den enseñansa ta konfrontando. Tambe a deliberá kon un koperashon ku un instituto manera ROC Mondriaan por fortifiká loke Kòrsou ta brinda na nos hòbennan i dosentenan den e sektor di horeka i turismo. Durante e siman ROC Mondriaan a bishitá tambe skolnan Maris Stella SBO (RKCS), Nilda Pinto SBO (DOS), Jacques Ferrandi VSBO (DOS), Marnix VSBO (VPCO) i tambe Universidat di Kòrsou. Tambe nan a sinta i deliberá ku Ofisina di Turismo, CHATA  i Academy Hotel tokante e retonan ku e sektor ta enfrentando pa ku servisio i personal di kaladidat.

Aparte di e organisashonnan aki ROC Mondriaan a sinta ku direktiva di Algemeeen Pensioen Fonds (APC) pa hana mas informashon tokante e plannan di e banko pa ku desaroyo di Plaza Hotel kaminda APC a duna di konosé e posibilidat pa krea un “leerhotel” kaminda studiantenan di sektor di horeca i turismo por risibí lèsnan práktiko.

E delegashon di ROC Mondriaan a keda impreshoná ku tur loke nan a mira i risibí na informashon i ta kere sigur den un posibilidat pa un koperashon estrecho skolnan na Kòrsou. Nan a duna di konosé tambe ku Ministerio di Enseñansa, Kultura i Siensia di Hulanda (OCW) ta sostené e posibel koperashon aki. Minister Croes tambe a keda impreshoná di tur loke e skol aki por ofresé i tambe e plannan ku e skol tin pa un koperashon.

Minister a enfatisá e importansia pa e koperashon ta sostenibel. Horeca i turismo ta un di e pilarnan mas grandi den nos sektor ekonómiko i enseñansa avansá den e sektor aki ta hunga un ròl importante, asina e mandatario a splika e delegashon. Entrega di hende kualifiká pa e sektor aki ta krusial. Kontinuidat den renobashon i modernishashon di formashon profeshonal ta importante pa un konekshon riba e merkado laboral di e sektor aki. Un koperashon entre ROC Mondriaan i Kòrsou por nifiká un fortifikashon di nos enseñansa i por ta di gran balor pa kresementu positivo den enseñansa avansá den ambos pais den reino. Komo minister e ta apoyá e koperashon aki i lo ke krisalisé a korto plaso den forma di un protokòl di koperashon.

Pesei na final di e bishita Minister di Enseñansa, Siensia, Kultura i Deporte (ESKD), Sr. Steven Croes a entregá na ROC Mondriaan un karta kaminda e ta ekspresá su deseo i disponibilidat pa riba tèrmino kòrtiku yega na un koperashon entre ROC Mondriaan i Ministerio ESKD.

Login