Minister van Heydoorn a splika ku ta bai drecha skolnan, vèltnan di deporte i salanan pa hasi deporte, miéntras ku lo bini un departamentu di Kultura.

Willemstad,– Minister Sithree van Heydoorn a habri aña 2023 splikando ku su ministerio a komprometé algun kos ku nan ta bai hasi e aña aki i tambe e revishon den nos enseñansa.

“Loke nos ta bai hasi tambe ta fortifiká e parti di re-numerashon di dosentenan i tambe e oranan ku nan mester traha i nan dianan di fakansi. Ta bai traha riba esakinan pa logra nan promé ku fakansi e aña aki. E ta splika ku e personal di sosten tambe lo mester bai haña loke nan tin añanan ta wardando riba dje i di manera ku nan por ehersé nan trabou ku mas smak loke ta yuda den mehorashon di nos enseñansa.

“Ta bai tin pues bastante kambio e aña aki pa ku nos enseñansa. Ya a kuminsá ku drechamentu di skolnan ku e plaka ku a bini for di Hulanda. Tin 20 piku mion pa drecha 12 skol mas i tin 20 piku mion mas ku por hasi apelashonnan riba dje.

Tambe e ta splika ku nan ta bezig ku e nul meeting ku lo mester pa nos por haña e otro fondo nan ku tin na disposishon.

Kultur
Pa loke ta kultura Minister van Heydoorn ta bisa ku lo no ta bai bini mas ku un Fundashon pa kultura, paso al final mas plaka ta bai den e operashon di e fundashon ku ta bai kaminda e mester bai. E ta bisa ku ta buskando un lokashon den Skalo pa pone un departamentu di kultura i nan lo mester hasi tur e trabounan ku e Fundashon tabata hasi. Pues ta buskando un área stratégiko ku por ta aksesibel pa esnan ku mester hasi uso di dje.

Deporte
Van Heydoorn ta splika ku ta bai mira e aña aki ku ta bai drecha diferente fasilidat deportivo. Ta bezig ku e sentro multi-funshonal na Barber. Despues ta bini na Montab kaminda ta bai kambia e lusnan i hasi esakinan LED. Tambe ta bai Sabana Ballpark ku ta bai haña yerba. Tambe ta bai kambia lusnan di Victory Boys i hasi esakinan tambe LED. Na Amaddor Nita Mavo ta bai drecha e lusnan den e sala. Na e vèlt di Little League di Willemstad ta bai pone yerba. Na Suvek minister a splika ku a hasi un donashon di 120 mil florin pa pone lus i ta bai usa e sn aki pa pone lus LED riba e vèlt B i riba vèlt A lo kambia e lusnan aktual pa LED.

Sithree ta bisa ku e fondo di deporte ku ta generando apénas mei mion florin aktualmente, ta bai ser kambia, ya ta trahando riba e lei pa por generá entre 2.5 i 3 mion florin pa aña. “Mi ophetivo ta pa usa e sèn aki pa drecha fasilidatnan”. E ta bisa ku lógiko ku biahe nan ta importante, pero ta bai nota ku hopi kos ta bai pasa pa ku drechamentu di e fasilidatnan. Pa loke ta Lotto pa deporte el a bisa ku ta bai kuminsá ku e sistema di skrèch miéntras ku ta sigui traha riba hinter e sistema di Lotto. Ta bezig ku kambio di e lei kaminda lo hinka diferente wega di gèmbel den dje i tur lo mester aportá na e fondo pa deporte.