Entre 2009 pa 2014, Tromp a kumpra dos apartamentu na Brickel Miami.

NIEUWE HAVEN— Tin indikashonnan bastante konkreto ku Ministerio Públiko ta buskando propiedatnan di Emsley Tromp. 

Fiskal di Ministerio Públiko, mr. Boswijk no ta ekskluí e posibilidat ku Ministerio Públiko ta bai buska propiedatnan di Emsley Tromp. Esei el a duna di konosé na final di su rekisitorio despues di a demandá 3 aña di kastigu pa Tromp .

Ta konosí ku Ministerio Públiko for di 2017, ta persiguí Emsley Tromp. Esaki for di 2017, unda a trata na separá e kasonan kontra di Tromp den tres tratamentu. E promé parti a enserá akusashon kontra di desvio pa evadí prosedernan di impuesto i pagamentu. Tromp a gana Ministerio Públiko tantu den Promé Instansha komo den Apelashon. E derotanan a shòk Ministerio Públiko i despues e fiskal konserní, Saskia de Vries a bandoná Kòrsou. Pero, Ministerio Públiko no a stòp i awor via di Hercules a sigui persiguí Emsley Tromp i huntu kuné awor su ayudante na  Banko Sentral, Rene Lourens. Via di Rene Lourens, Ministerio Públiko ta kuestioná formulashon di konstrukshonnan di fiansa i opsekio te hasta riba teritorio venezolano. E periodo dje kasonan a tuma lugá segun Ministerio Públiko entre 2007 pa 2014. Algun dje formanan di fiansanan a bini dilanti kaba durante tratamentu den Kortenan penal  na 2018 i 2019, unda hasta ARC, Kámara di Kompabilidat General a konkluí ku e fiansanan tabata legítimo. Ministerio Públiko den kaso Hercules a presentá  sospecho riba falsfikashon  riba fiansanan  di 1.3 mion dòler i na dos okashon 400 mil dòler unda a uza diferente kompania inkluso sukursal di Armani Exchange i via di un kompania Curacao Fashion Group, CFG.

Ministerio Públiko  ta kombensí ku tin motibu pa persiguí e dos akusadonan. Un pensamentu ku ta krea duda den e propósito di e persekushon mirando e kantidat di añanan ku a traspasá. Tromp den kasonan sivil a pèrdè tur proseder ku e la entamá miéntras den tratamentunan penal a wòrdu liberá pa Korte na dos okashon. Aparentemente, pa motibunan deskonosí Ministerio no a keda satisfecho.

Tur propiedat di eks direktor na Banko Sentral, Emsley Tromp  por bira alternativa pa Ministerio Públiko inisiá un proseso di ekspropiashon. Rumornan no konfirmá ta señalá ku lo bai tras di Tromp tambe pa un suma di 8 mion florin pa finansiá e.o. kampana di “SI” na 2009. Esaki por ta unu dje motibunan prinsipal dikon Ministerio Públiko tòg por bini bek kontra di Emsley Tromp.