Back to Top
Vigilante banner image

Ministerio Públiko ta start kaso mionario den afèr Campo Alegre


April 5, 2023 • 2 minüt pa lesa

Aprel 2020: na 2020, outoridat di imigrashon a saka último damanan di trabou for di Campo Alegre manda nan pais.

Nieuwe Haven—Ministerio Públiko, representando Gobièrnu di Kòrsou a inisiá un proseso sivil kontra di un grupo ku tabata ligá den maneho na Campo Alegre. Ta trata di e kompania Wilshire Advisor Limited, unda a sita e hòmber hulandes  Bart Verhage pa presentá den korte representando Wilshire.

E konstrukshon di Wilshire den operashon di Campo Alegre ta bai bèk temporada ku defuntu Giovanni van Ierland tabatin maneho i poder na Campo Alegre. Huntu su konsehero legal defuntu Leslie Franklin, nan a traha un struktura di kompania. Den e struktura aki tambe tabatin sosionan hulandes oropeo entre nan Bart Verhage, kende semper a bisa di a invertí miónes den Campo Alegre.

Ministerio Públiko a inisiá un proseso sivil i por resultá di ta unu ku por den miónes. Lokual tin kologá entre e Ministerio Públiko i Wilshire, ta un desishon di korte riba ekspropiashon (ontneming). Probablemente e kaso sivil entamá lo trata esaki tambe.  Ministerio Públiko kier ehekutá e sentensia di ekspropiashon di Korte Superior di 20 di novèmber 2008. E doñonan di Campo Alegre, esta Wilshire Advisors Ltd. establesé na Tortola, British Virgin Islands i e eksplotadó Campo Alegre CV, a keda ekspropiá di mas di 25 mion florin, ku mester bai Estado di (Antia Hulandes e tempu ei), manera e sentensia ta indiká.

Wilshire Advisors Ltd. a keda kondená pa paga 14.219.548 florin i Campo Alegre CV i 11.040.806 florin, pues un total di 25.260.354 florin. E siguiente aña despues dje sentensia a asesiná un dje doñonan Giovanni van Ierland. E tabata forma parti di Wilshire Advisors. Korte Superior ta mira Wilshire Advisors komo e vehíkulo usá pa un organisashon kriminal pa labamentu di plaka. I a konkluí for di e pruebanan ku plaka di ganashi di benta di droga pa Oropa a keda labá via entidatnan legal. E plaka ku tabata bini bèk a keda invertí den renobashon di e kompleho, pa hasié mas bunita.

Den e kaso ei tabatin mas kompania embolbí, esta Krisia NV, Curaned Vastgoed NV i Talisa NV. Nan tambe a keda kondená den Korte di Promé Instansha riba 22 di yüni 2007. Tantu Krisia komo Talisa a keda kondená pa paga 2.250.000 florin nan kada unu, pero Korte Superior a destruí e sentensianan ei. E kompanianan aki tabata sosio general di Campo Alegre CV. i un simpel kapa pa e vehíkulo di labamentu di plaka mes, esta Wilshire Advisors.

E kaso aki a sigui kologá den laira pa hopi tempu. Eks fiskal di Ministerio Públiko, Wouter Tielkemeyer tambe un tempu a laga kobra via di un ofisina di dùrwarder ulandes na Kòrsou, unda despues tabatin dos chek di kasi 300 mil florin, pero despues no a tende nada mas riba e kaso. E problema a lanta bek, despues ku a inisiá e proseso pa bende Campo Alegre i bankonan lokal no tabata kier a koperá pa duna un “compliance” riba e benta, esta unda lo a depositá e sèn. Dor ku Campo Alegre a keda sentensha den pasado riba labamentu di plaka, niun banko lo no ke hasi e transakshon di benta.

Login