PUNDA,– Den un publikashon di djaweps 6 di mei, e kompania di Moderna a duna di konosé ku efektividat di e bakuna kontra Covid-19 serka adolesentenan ta similar na e resultadonan konosí serka adulto.
Ademas por bisa ku te ainda no a detektá ningun problema grave den e grupo di adolesente ku a keda bakuná.E tasa di efektividat di e bakuna di Moderna den adolesentenan entre 12 pa 17 aña di edat ta mustra di ta 96%. E análisis a keda hasí riba 3.235 partisipante, kual a risibí por lo ménos un shòt di e bakuna. Kòntròl a keda hasí 35 dia despues ku e partisipantenan a risibí e bakuna. For di esaki por a saka afó ku e bakuna ta generalmente bon tolerá serka adolesentenan i no tabata tin niun reportahe di problema ku seguridat di bakuna den e grupo aki.Debí na e tasa abou di infekshon serka adolesentenan no tin hopi infekshon severo di Covid-19 den e grupo aki, kual ta resultá den un efektividat haltu di e bakuna pa kasonan di infekshon leve.
E resultadonan menshoná ariba ta preliminario, Moderna lo kontinuá e investigashon di efektividat di e bakuna riba adolesentenan pa rekoudá mas datos promé ku por forma un konklushon general. Pues ainda reguladónan di medisina no a aprobá uso di e bakuna pa personanan bou di 18 aña. Resultado di efektividat di e bakuna riba mucha ( 6 luna pa 11 aña) no ta optenibel ainda, si por konfirmá ku investigashon pa esaki ta kanando.