Kaminda Ma Pieternella unda e aksidente fatal a tuma lugá.

Willemstad— Ayera den oranan di anochi a surgi un aksidente fatal riba Kaminda Ma Pieternella unda un motosiklista a bin pèrdè su bida.

Tabata den oranan di anochi ku Polis a keda dirigí pa Kaminda Ma Pieternella esta e kaminda ku ta pasa den e bario di Boka Samí pa un aksidente basta serio. Polis ku a yega na e sitio a bin topa ku un hòmber drumi pechu ariba riba kaminda i ya no tabata reakshoná mas. Entretantu ambulans tambe a presentá i a tuma nota kon sanger tabata basha fo’i un herida basta grandi tras di su kabes. E personal di ambulans mesora a kuminsá ku e parti di reanimashon pero esaki tabata enbano.  Polis a sera e aria i a pidi presensia di e demas outoridatnan pa asina por a kuminsá ku investigashon. For di e investigashon preliminar a bin saka afó ku e víktima esta e motosiklista a kaba di sali  Boka Samí i tabata koriendo den direkshon di Klein St Michiel.

Yegando den e bògt pa bai su bi e pida kabes di seru pa por sali for di e bario di Boka Samí e víktima riba e bròmer a hala muchu na su man robes pasa dal kontra di un outo ku tabata biniendo for di e direkshon kontrali pa despues e bròmer sigui bai pega kontra di un palu di lus. Debí na e choke aki e víktima a sufri un kaida i a keda lastra riba kaminda.  Dòkter di Polis i tambe Patólogo ku a presentá na e sitio a konstatá morto i riba órden di un Fiskal a konfiská e kurpa sin bida pa mas investigashon. Entretantu a bira konosí ku ta trata di un miembro di e kuerpo di Bombero kual a pone ku vários miembro a yega na e sitio pa pone nan mes nan altura di nan kolega ku a bin pèrdè su bida. Ya for di na e sitio por a dedusí ku ta trata di e víktima Dayly Balentina nase na Kòrsou dia 29 di yüli 1986. Di parti di Vigilante ta bai palabranan di kondolensia na famia di e defuntu ku e pèrdida di nan ser kerí.