Giselle Rosalia kende a bira e lider nobo di partido Movementu Kousa Promé.
Skalo,– Ayera despues ku e partido polítiko Movementu Kousa Promé a bin entregá nan lista pa elekshon 2025, a bin sali na kla ku e partido ta bai kumpli 10 aña.
Na e momentunan aki a sali na kla ku Giselle Rosalia a bira lider di e partido i e lider anterior kende tabata Rene Rosalia a bira number 6 riba lista. Deklarashon nan di René Rosalia ta indikativo ku e polítiko ke duna chèns na otronan mirando ku Rosalia no a logra di drenta den parlamento den e último elekshon nan ku Movementu Kousa Promé a partisipá aden.
Segun lider di e partido, Giselle Rosalia, 10 aña largu Movementu Kousa Promé a traha riba konsientisashon i formashon di e komunidat. “Nos ta konvensí ku ta un pueblo konsiente ta risibí e gobièrnu ku e ta meresé i ta p’esei formashon den e liña humanismo di nos ta asina importante”. Den otro palabra, pasó ta ku formashon i konosementu so, un persona por avansá den bida. Tambe por a nota ku Rosalia a enfatisá ku úniko manera ku por bin kambio ta si invertí den e kapital humano. “Ta p’esei pa nos, konsiensia, formashon, edukashon, enseñansa i sosial ta importante den gobernashon di nos pais” Rosalia a splika. Mesora e polítiko a agregá ku e trayekto ariba menshoná ta un trayekto largu ku mester wòrdu kaná.