E muhé ansiano aparentemente ta esun na kabes di e grupo.

BOGOTA – Outoridatnan kolombiano a detené na Bogotá, un wela di 73 aña di edat huntu ku otro dos persona mas, señalá di ta un di e mayor gruponan dediká na fabriká i distribuí droga sintétiko na e kapital kolombiano.

Den desaroyo di e lucha kontra banda nan ku ya distribuí droga na Bogotá, e Kuerpo Tékniko di Investigashon, a haña mas di 500 píldora di diferente droga sintétiko, 54 telefon selular, sakunan di plèstik ku kokaina i mariwana, plaka kèsh i un arma di kandela.

E elementonan di prueba rekompilá den kasi un aña di aktividatnan investigador, a permití na identifiká e posibel integrantenan di e organisashon, na konosé nan ròl i maniobra nan pa skonde i bende e droga den entre otro skolnan, universidat i sitionan nokturno.

Segun fiskal nan, Blanca Rosa Betancourt ta supuestamente e kabesante di e struktura delektivo i ta esun ademas enkargá di e elaborashon di e supstansia nan ilegal.

Tambe ta akusá esaki di kordiná e benta via Internèt i retnan sosial den shete diferente lokalidat di Bogotá, inkluso Chia, un munisipio den serkania di Bogotá.

E ansiano a elaborá balsnan ki e tabata meskla ku kokaina i fentanilo, dos supstansia ku por ta letal, ademas di ekstasis, mariwana i e tiponan di droganan aki.

Segun e investigashon, Betancourt i e sobrá miembronan di e grupo di delinkuente tabata atkerí fentanilo i otro droganan uzá pa trata doló i meskla esaki nan ku droganan sintétiko pa oumento e efektonan.

E detenidonan a keda akusá di delitunan di tráfiko, fabrikashon i porte di droga i tambe plan pa kometé delitunan ku no a keda aseptá, pues a keda mandá direktamente pa prizòn.